Misiangtho Eulalia Pawini. (December – 10)

Misiangtho Eulalia in AD 290 hunin Spain gam a om, a minthang mahmah innkuan khat sungpan suak hi. Eulalia in singkhuah kuang mahmah tawh a nunkhum nih gel halna thuakin na sa mahmah taleh Pasian min phatna lo buang, a muk a kam pan them khat zong a thum a tau lo, kum (12) gual numeino khat ahi hi.

Eulalia in a neutung pankipan nunnemin Pasian adingin ama nungakna, siangtho takin a kem khat ahi hi. Ahi zongin AD 304 kum ciangin Emperor Diocletian in gammi khempeuhin milim bek a biak na ding un thu piakna khat nei hi.

Tua hunin naupangno lai ahi Eulalia in dawi biak ding, milim biak ding pen hangsan takin nial hi. Tua mun pan a suahtak nading in Eulalia in zan hun sungin vaihawm a, zingsang khuavak ma in Merida ah tung hi.

Ahi zongin tua ni zingsang mahin thukhenna zum pan amah ki samin a gilo mah mah thukhen mang pa mai ah thusitna thuak a, dawi biakna a zuih nading a sawl uh hangin Eulalia in na nial veve hi. Thukhen pa in Eulalia pen zol bawl in hitaleh, khem bawlin hitaleh a zawh loh kawmkal ah Eulalia in dawi thoih nading in a ki koih cake moh te sikzan in thukhen pa a cil na phinsan lai hi.

Tua ciangin thukhenpa hehlua a, Eulalia pen a cingte mansakin akkeng lim khuam tungah hencip sak hi. Tua zawh ciangin a nunkhum nihte singkhuahkuang tawh halin a pumpi pen singkhuah tawh satin bawlsia sak hi. A nunung ciangin a sam mei tawh hal in a pumpi vekpi mei in kangin si hi.

Tangthu sungah Eulalia mei a ki hal laitakin a kam pan vakhu kang khat pusuakin vantung lam a lengto hi. Tua thu a mu mithat te in lau lua ahih manun Eulalia ii luang nusia in tai mang uh hi ci hi.

Misiangtho Eulalia aw…kote adingin thu hong ngetsak in.