Misiangtho Virginia Centurione Bracelli Pawini. (December – 15)
Misiangtho Virginia in 1587 kumin Italy gam, Genoa ah suak hi. A suah zawh ni nih a sawt ciangin tuisawpna sacramentu sang a, pasian thu tawh lamlahna pattahna te tawh khangkhia khat ahi hi.
Virginia in ama nungak siangtho na pen Pasian ading in ap ding a hanciam hangin a Pa vaihawmna hangin ama lunggulhna nusia in 1602 kum in pasal nei hi. Virginia lawmpa te innkuan in neih leh lamh a hauh uh hangin a pasal pen kham theih guih theih tawh a kidiah khat ahi hi. Virginia te in ta numei nih, Lelila leh Isabella nei uh hi. Virginia in a Pa deihna bangin pasal a nei ahih hangin a pasal tung ah lungduaina, itna tak tawh theih siamna nei hi. 1607 kum in a pasal dam lo-in si hi.
Virginia in kum (20) a phak hunin meigong khat suak a, a pa in pasal a neih kik nading a vaihawm hangin Virginia in sang zo lo ahih manin ama lunggulh na te a pa kiangah gen hi. A pasal a sihzawh nungah Virginia in a teek te inn ah om in a tanu tenih mailam nuntakna nading leh pilna lam ah hoih tak pantah kawmin thungetna leh piakkhiatna te tawh amah leh a mah ki-ap hi.
1610 kum ciangin mizawng te tungtawn in Pasian ading kipiakkhiat ding Virginia in a lungtang sungpan lunggulhna nei hi. A pa ii khamna kawmkal ah Virginia in mizawng te ading ama nuntakna piakhia in ama neih leh lamh sung pan seh lang pen mizawngte ading in pia khia hi.
Amah in a diakdiak in a ki paai naupangte, piteek puteek te, a damlo mite leh a ki nawlkhin mite en in kem hi. 1625 kum in a teek nu si a, a teek nu a sih zawh ciangin hehpihna nasep te nasia takin sem semsem in tua ama nasepna a tangzai zawk nading in mun te inn te lam in ki pawlna zong phuan hi.
1629-1630 kum sung, pul natna leh kialpi a tunna hangin Virginia in nungak siangtho sang khat kawmin tua lai ah cimawh dongtuak mite khoi hi. A sawt ciangin tua nungak siangtho sang gei aom inn pi nih lei-in tua lai ah dongtuak mite a kep bek thamlo, lungkham mite belh nu cih Tonu Maria tungah a ki-ap biakinn khat zong lam hi.
Tua ama nasepna ah a kihel, a lut numeite in nungak siangtho hitaleh, hitakei leh zawngkhalna, thu mangna zui ding in kiciamna nei uh a, amau kiciamna bangin zui in nungta kalsuan uh hi. Virginia in tua bangin hehpih nasepna te a sep kawmin numei te ading ki pawlna nih phuanin tua ki pawlna te midangte makai sak a, amah ahih leh mi kiangah khutdawh ngenin nungta hi.
Virginia in ama mun ah mi khempeuh adingin Nu khat ahi hi. A diakdiak in cina, adam lo te, nek leh dawn a nei lo te ii Nu ahi hi. Virginia in a pualam ah pusuakin a om hangin kipawlna sunga piang haksatna te hangin kipawlna sungah lut kikin makai kik hi. Virginia in 1651 kum, December 15 ni, ama kum (64) in si hi.
Misiangtho Virginia Centurione Bracelli aw…kote adingin thu hong ngetsak in.
