Christmas Pawi: Thupha Bawl pawi
Laisiangtho sungah Christmas bawlna thu naki ciamteh lo in, bawlna ding zong kigelh lo hi. Topa Jesu leitungah anuntak lai in, asuahpawi bawl hi cihthu zong Laisiangtho sung munkhat beek ah nakigelhlo hi. Topa Jesu hong suah lai in anu Maria leh Joseph bek na om uh a, dia khilkhial in, neu ending nangawn u le nau cihding khat bek na omlo hi. Ahi zongin, Pa Pasian in, vanmi te sawl in, mite thupi asakloh uh ahi tuucing te kiangah va paisak a, leitungmi te ahonkhia ding bawngan kuang sungah asuahna thu vahilh sak in, tua a asak la in, Van asangbel ah Pasian minthang ta henla, leitungah ama adeih mi te tungah nopna omta hen cih la ahihi.
Tuhun ciangin, Laisiangtho sunga akigelhlo, Laisiangtho hongsawlloh ahi, Topa Jesu in zong khatvei zong abawlngei loh ama suahpawi pen Christmas pawi ci in, leitung khempeuh in zum tuamtuam te nangawn khak in, pawipi khat in kibawl hi. Sola Scriptura ci in Laisiangtho bek aci mitampi te in zong, Laisaingtho sung a aom het lo ahi, Christmas pawi hongbawl pih uh pen Christian te ading in alungdam huai penpen thukhat ahihi.
Eite dawn suahpawi, eite bawl suahpawi pen Jesu Topa suahpawi ahihi. Ama suah hunlai takin bang ci in hongsuak a, kua te in nadawn in, bangla tawh, bangci bangin nadawn uh hiam cih te lungngaih kikkik ding nakpi tak in thupi hi. Eite bawl suahpawi nei pa ahi Topa Jesu bawng annkuang sung ah akhualum nading puanlum no nangawn nanei lo hi. Topa suahpawi idawn na hangin silhlehteen neilo khat, i khua sungah meigong tanggah khat in, niklum khat puanlum khat angah ding hun ahihding Topa in lunggulh mahmah hi. Tua apia ding pen nang leh kei hongsawl hi. Nang pia kei leh cin Topa in nangtung hongpiak thupha hongsik kik leh bangci nadawn ding hiam? Nasuah pawi ni in, pawibawl in nuamsa kahih man in, mangngilh kha ing ci ding nahiam? U lian te, zumnasem tuamtuam te leh, min le zanei tuamtuam te nitak anvak nuam kahih manin, kasum kapaai kicing thei mahmah lo hi Topa aw ci ding nahiam?
Topa suahpawi i bawlna in, gualnopna bek hi lo in, Thupha bawl pawi pi, Thupha bawl pawihun ahih ding thupi hi. Tua thu hangin, Catholic Pawlpi in, Laisiangtho sung ah Christmas nabawl un hongci lo napi in, Topa deihna tawh kituak Christian nuntakzia nuntakna ah picin semsem nading in Christmas pawi pi hong bawlkhia ahihi.
Rev. Fr. Damian Dal
