Catholic Nisim Lungdamna Laisiangtho. Lungdam pawi Kaal sung. 4.1.2025 (Sat)

John 1:35-42

35. A zing ciangin John in a nungzuite nih tawh a din’ khop laitakin,
36. lampi ah Jesu a pai mu a, “Pasian’ Tuuno, en un!” a ci hi.
37. A nungzui nihte in ama thu a zak uh ciangin, Jesu’ nung a zui uh hi.
38. Jesu kihei-a, amaute in a nung a zuih uh mu a, amaute’ kiangah, “Note in bang zong na hi uh hiam?” ci-in a dong hi. Amaute in, “Rabbi aw, koi lai-ah om na hi hiam?” a ci uh hi. (Rabbi(a) a khiatna in ‘Sia’ cihna ahi hi.)
39. Jesu in amaute’ kiang ah, “Hong pai unla, hong en un,” a ci hi. Amaute va pai uh a, a omna a mu uh hi. Amah tawh tua ni a taam khawm uh hi. Tua hun pen nitak nai li(b) pawl ahi hi.
40. John’ thu za a, Jesu’ nung a zui nihte’ lakah khat in Simon Peter’ sanggampa Andrew ahi hi.
41. Amah in a u Simon zong masa-in a muh ciangin ama kiangah, “Messiah(c) ka mu zo uh hi,” ci-in a gen hi. (Messiah a khiatna in ‘Sathau kinilhpa’ a cih nopna ahi hi.)
42. Amah in Jesu’ kiangah Simon a paipih hi. Jesu in Simon en a, “Nang in John’ tapa Simon na hi hi. Nang pen Cephas(d) hong kici ding hi,” a ci hi. (Cephas a khiatna in Suangpi a cihna ahi hi.)

Hi in Topa’ Lungdamna Laisiangtho ahi hi.