Dot na: Father aw, i Siampi te i sap ciang Pa or topa i cih pen, lai Siangtho tawh kileh bulh hi lo ahiam?

Dawng na: Amasa pen pen theih ding, LST sung ah, Pa bek hi lo Sia aw ci-in zong na kisam kei un ci.

I theih ding anihna ah Pa or Topa or Father cih i sap ciang Vantung a om Pa Pasian dan in ngaihsun a i sap leh i sap loh, ei le ei aki thei pen le aki tel pen i hi ding hi. Ei Catholic pawlpi mite in, i siampi te kiang ah Topa or Pa ci isap ciang in, Vantung a om Pa Pasian ih cih na hi lo hi.

Matthew 23:9-10 ” Vantungah Pa khat bek nei na hih manun leitungah kuamah dang, Pa na ci kei un. Topa dingin Christu bek nei na hih manun note khatlekhat, Topa, na kici kei un.”

Lai Siangtho i sim ciang in, ei ma i deih na bek sim ding hi lo a, tua Lai Siangtho i, amai leh anung zong et ding hoih hi.

Topa Jesu in hi thute bang hang gen hiam cih i theih nop leh Matthew 23:2-6 sim ding kisam hi. Tua sung ah, ” Thukham hilh siate le Farisi mite, Moses aana a nei- in thugente ahih manun, amaute gen khempeuh zui-in sem unla, ahi zongin amaute pen agen bangun gamta lo uh ahih manin amaute gamtat bangin gamta kei un………………………”

Matthew 23:11-12 “Note lakah a lianpen pa, na nasem uh hi ding hi.” The greatest one among you must be your servant. Whoever makes himself great will be humbled, and whoever humbles himself will be made great.” Topa Jesu i deihna bang hiam ” i gen bang in gamta ding, kiliansak lo ding, kiniamkhiat ding” ahi hi. Eite sang alianzaw i Pasian om hi cih mang ngilh lo ding.

Theih ding thu:#

Cahtolic pawlpi mite in, i Siampi te Pa acih na pen, kha lam ah i pate ahih man hi. Pasian thu hong hilh, Sacramentu te hong pia te ahih man ahi hi.

Genesis 45:8 “Amah in Pharo khutnuai ah a ulian penin kei hong bawlin, ama innsung khempeuh Topa le Egypt gam khempeuh a ukpa in kei hong bawlkhin hi.

Job 29:16 ” Mizawngte adingin a pa uh ka hi a..”

Isaiah 22:20-21 “Amah pen Jerusalem khua a teng mite le Judah mite tungah pa hi ding hi.

Kumpi Nihnate 2:12 “Tua ciangin Elisha in tua mu-in amah akiko a, Ka Pa, Ka Pa! Israel mite a hupipa! Nang pai ta maw! a ci hi.”

Kumpi Nihnate 6:21 ” Israel kumpipa in amaute amuh ciangin amah in Elisha kiangah, ka pa aw, amaute ka that ding hiam? a cihi.”

1 Cor 4:17 “Tua thu hangin note kiangah, ka it mahmah, Topa thu sungah a citak mahmah, ka tapa Timothy ka hong paisak hi. (Theih ding.. ka tapa a cih na pen Kha sung le Pasian sung ah ka tapa acih nopna hi. Tua dan mah in Paulu pen Timothy ading in kha sung ah a pa hong hi ta hi)

1Timothy 1:2 “Thu upna sungah ka tapa taktak ahi Timothy tungah lai ka hong khak hi.”

2 Timothy 1:2 “Ka it ka ta Timothy tungah lai ka hong khak hi.”

2 Timothy 2:1 “Ka ta aw, nang na hih leh Jesus Christus tawh i kipawl manin i ngah hehpihna hangin thahat in om in.”

Philipians 2:22 “Ahi zongin Timothy ahih leh lungdamna thu nasepna ah pata bang ka hih manun manpha mahmah hi.”

Titus 1:4 “Thu upna ah ka ta taktak ahi Titus tungah lai ka hong khak hi.”

Philemon 1:10 “Tua ahih manin Christu hangin ka ta ahi Onesimas adingin ka hong thumsak hi.………”

1 Peter 5:13 “Ka tapa Mark in zong note hopihna kammah hong khak hi.”

3John 4 “Tate bangin ka hong neih mite a mantakin a gamtatna uh ka zakna hangin ka lungdamna sangin adang lungdamna lianzaw bangmah om lo hi.”

Galatian 4:19 “Taneute aw, note in Christu pianzia bang na neih dong uh, naupaii nupi in ta asuah ding a gimpih bangin note ka hong lunggimpih ding hi.”

Atawp na ah, Sia ci-in na kicih ding uh hi lo

Matthew 23:7-8 sung ah ” Mihon lakah mite in hopihin, Sia aw, a cih ding uh a ut uh hi. Ahi zongin note pen, Sia, na kicih ding uh hi lo hi. Sia khat bek na nei uh a, no adangte khempeuh unau khat na hi uh hi.”
I pawlpi hong makai, Pasian thu hong hilh pastor te Sia ci kei leng lawm ci ding maw. Lai hong hilh te Sia/ siama ci in sam kei leng, koi dan sam ding? Lawm mah ci ding maw, ahih kei leh aminpi mah tawh sam ding maw?

Ahih zongin LST sung ah Sia na zang veve hi,
1 Timothy 2:7 A teacher of the gentiles in faith and truth.
2 Timothy 1:11 A preacher and apostle and teacher.
1 Cor 12:28 and Ephesians 4:11: Apostles, prophets, evangelists, pastors and teachers.

Catholic ten a Siampi te, Pa or Topa or Father, ci sap zong akisam thei veve hi. Pasian thu palsan na hi lo hi. I pawlpi sia te pen Sia mah hi.
RC sung ah Siampi leh Sia om hi. Ki bang lo hi.

Pawldang te ading in, A pastor te uh Sia ci asam hang un mawhna om tuan lo hi.

A thei ding le a telsiam ding in Pasian in lungsim khuavak na hong pia ciat ta hen.

+Christu sung ah zaktakna tawh+

By Fr. Paulinus