Catholic Nisim Lungdamna Laisiangtho. Hun Nautaang Kaal (3) Na. 1.2.2025 (Sat)

Mark 4:35-41

Tua ni, nitak lam ciangin Jesu in a nungzuite’ kiangah, “Galkhat lam ah pai ni,” a ci hi.

Amaute in mihonpite nusia-in paikhia uh a, gunkuang sunga a na om khin Topa tawh tuang khawmin a pai uh hi. Gunkuang dangte tawh zong amaute a tonkhawm uh hi.

Huihpi nakpi-in hong nunga, tuihualte in gunkuang vat a, gunkuang sungah tui a dim dektak hi.

Ahi zongin Jesu gunkuang nunglam-a kingapna tungah ihmu-in a om hi. A nungzuite in amah phong uh a, “Sia aw, kote ka siat ding uh phamawh sa lo na hi hiam?” a ci uh hi.

Jesu tho-in huihpi le tuihualte taai a, tuipi’ kiangah “Dai in! ” a ci hi. Tua ciangin huihpi khawl a, tuihual a dai pah hi.

Jesu in amaute’ kiangah, “Bang hangin note lau na hi uh hiam? Upna nei lo na hi uh hiam?” a ci hi.

Amaute lau lua mahmah uh a, “Hih mipa kua ahi hiam? Huihpi le tuihualte nangawn in a thu a mang uh hi!” a kici uh hi.

Hi in Topa’ Lungdamna Laisiangtho ahi hi.