Misiangtho John de Britto Pawini.(February – 4)
Eite in natna satna te pan damna ih ngah nadingin zatui zaha ne-in ih kibawl banah thungetna tawh nakhempeuh a bawl thei Pasian ih beel hi. Tuni pen a neu lai-in adam lo pasalno khat adingin a nu leh pa te in St. Francis Xavier kiangah huhna ngenin ama panpihna hangin damna a ngah kik, a dam kik khit ciang St. Francis Xavier te lawmta ii phuatsa Jesuit kipawlna ah lutin Misiangtho a suak John de Britto pawini hi.
De Britto pen Portugal gam, Lisbon aom mihau innkuan sung pan suak hi. Amah aneu lai-in nakpi takin damlo ahih manin a nulepa te in Portugal gammite zahtak leh it mahmah ahi, St. Francis Xavier tungtawnin thu a nget na uh pan damna ngah kik hi. Britto mahmah in zong mission nasep a sem nuam mahmah khat hi. A diakdiak in St. Francis leh a lawmte phuatsa ahi Jesuit kipawlna ah lutin St. Francis Xavier bangin Europe gam pan Asia gam dongah mission pai ding tha lawp mahmah hi.
Tua ahih manin Britto in ama ngimna bangin Jesuit sangah lutin Siampi a suah khit ciangin a nu leh pa, sanggam ulehnaute phalloh kawmkal pan alawm Jesuit Siampi (27) te tawh India gam ah 1662 kum, December 17 ni-in kuankhia uh hi. Ze-et haksatna tuamtuam kawmkal pan amau ii cihtakna leh hanciamna te tawh gualzawhna tampi ngah uh hi. 1682 kumin India gam missionary te makai pi dingin Britto in teelna ngah hi. Tua hun lai takin gam sung buaina hangin mi tampite dongtuak mahmah uh hi. Tua banah annek tuidawn haksatna, tui khanna leh guta tamna te sungah Britto in sun leh zan khawl lo-in hanciam takin mi khempeuh huh hi. Mission nasep it mahmah ahih manin India gam a om gam mite silh bang puante bek silh hi. Ahi zongin amah a haza mi tampi na om a, tua te in amah a tuamtuam tawh lauthawng in, manin satgawp in a sih dektak dongin bawlsia in khah kik uh hi.
John de Britto in 1683 kumin Europe gamah ciah kikin ama mission nasepna ah a muhna, a tuakna te hawmkhia kik hi. 1890 kumin ama Jesuit Siampi (25) te tawh India gamah pai kik uh a, tua apai na lampi ah huihpi nasia tak tuakkha uh hi. Tua huihpi hangin a lawm te pawl khat lamkal ah si uh hi. Britto India gam ah a tun kik khit ciangin India lim laksiam Marava prince leh mi tampi te Christian upna sungah lut uh hi. Ahi zongin Britto ii nasepna te a haza, a deih lo mi tam semsem a, tua te in Britto pen India gam pan a hawlkhiat theih loh uh ciangin manin simmawh bawlsia uh a, 1693 kum, February (4) ni-in thatlum uh hi. Misiangtho John de Britto ii sisan luankhiatna leitang tungah Biakinn pi khat ki lam a, ama tung tawnin thungen mi, a ni ni in tam semsem khang semsem hi.
Misiangtho John de Britto aw…Kote adingin thu hong ngetsak in.
