A (1) Veina Sakollam St. Paul Parish Khangnote Pasian Thu Sinna leh Khangno Pawi, Lezang Khua (6-10.3.2025)
Sakollam St. Paul Parish Priest Rev. Fr. En Khan Mang phalna tawh Rev. Fr. Andrew Thang Muan Tuang (Assistant P.P) leh Khangnote in Lezang Khua ah Khangnote Pasian thu sinna leh Parish Khangno Pawi March 6 zintun ni pan 10 ni zinciahni dong hun bit ni (3) sung nasia takin bawl uh hi.
Tua sungah (1) Rev. Fr. Damian Dal (Phai, Siangtho Lungtang Parish Priest) in Biakpiakna leh Khasiangtho Nasepna tawh kisai,
(2) Rev. Rev. Fr. Joseph Zo Mung (Kalay Diocesan Social Communication leh RVA Director) in (Youth & Social Media) cih thulu tawh Khangnote Khantoh Nang bangci bangin Kizopnate Zangsiam Ding cih tawh kisai,
(3) Rev. Fr. Andrew Muan Tuang (Asistant PP) in (Scripture) cih thulu tawh Laisingtho Pasian Kammal Thuciam Lui leh Thuciam Thak te bangci bangin nuntak pih ding, cih thu te leh,
(4) Sister Mary Lian (Sakollam Siapinu) in Tonu tawh kisai a theih huai tuamtuam leh Khikhin dan cih bangin Siampi (3) leh Nungak Siangtho (1) in hilhcianna nei uh hi.
Sun Hun sung teng Pasian thu kisin in nitak hun tengin lenkhopna, Pasian thu tangkona leh a khua khua in (Choir, Duet leh Solo) cih bangin la kidemna ki nei hi.
Hih kidemna te ah a khatna pan a thumna dong angah te letsong piakna ki nei hi.
Khangnote Pasian thusin khual pan (130) pha in innteek khua te tawh nisim in (150) pan (200) kikal ki pha thei den in nitak lenkhopna hun te ah zong Khua sung mite Pawl tuamtam panin thangahtakin hong pai den uh ahih manin mipi (800) kim ki pha denin nuam kusa mahmah hi.
Sakollam, St. Paul Parish Khangno makaipa Michael Tungpi genna ah Sakollam pen Parish angah zawh kum (25) bang pha khinin ni dangin Tedim Zone Centre Sakollam a hih manin Zone min tawh Khangno Pawi zong ki bawl ngei bek thamlo in Kalay Diocese bup Khangno Pawi zong Sakollam ah ki bawl ngei hi mah ta leh Parish min tawh a ki bawl lam pen makai lui te tawh kikupna ah ciaptehna a ki cian omlo bek tham lo in tu-in a hih leh Tedim Zone Centre pen Myoma ah ki tuah in Lezang khua leh Anlangh Khua te zong nidangin Tuithang Parish hi-in tu in Sakollam Parish hong hi ta in Zone Centre mun kilaihna, Khua tuamtuam kibehlapna leh kikenkikna cih te a om banah Khangno Pawi Limlim a ki bawl loh zawh kum (10) kim bang hita ahih manin a kician in ciamtehna omlo ahih manin Sakollam Parish acing akem Siampite, Nungak Siangthote, Thuhilhsia te leh Khangnote kikupna tung tawnin tu a pen a (1) veina ci ni ci-in a kikipsak hi cih thu hong pulak khia hi.
Ih gamsung ah haksatna buina leh Sakollam mahmah zong pan galtai tampi om hi mah ta leh tua te kawmkal pan ih nusiat theih loh a hi Pasian thu pen Sakollam Khangnote in hong phawk kha in Parish Level tawh a khat veina Pasian thu sinna leh Khangno Pawi te a lemna munmun ah hanciam takin hong bawl thei ahih manin ih Diocese min tawh lungdam ih ko hi.
Hih Khanno Pawi ah a ki hel khangno tengin tha ngah mahmah uh ahih manun Rev. Fr. Andrew Muan Tuang vaihawm siamna tawh maikum ciang khangno pawi bawl na ding upna kamciam amaute sung mah pan ki dong pah in tengza (100 Lakhs) kim ngah pah uh hi.
Tu kum zong gamsung gampua pan khangno te huhna tawh Pawi a ki bawlzo hi-in maikum ciang zong amaute khat ciat hanciamna uh leh gamsung gampua pan huhna tawh bawlkik zo dinguh a hih manun khangnote lawp thei mahmah uh hi.
Tu hun pen gamsung buaina hang tawh khangno pawi a bawl zolo Parish ki tam mahmah ahih manin a bawlzo lo te in zong a bawlzo te kiang ah pai-in Pasian thu kisin thei hi cih thu manpha khangnote hong thei sak nuam ing.
Ei Khangnote in leitung pilna leh sumlepaai te ih zon mah bangin Pasian thu zong ih hih zawh zah in ih zon zawh nang hanciam ding kisam pha mahmah hi. Ih Pasian mah numbat khat in koihzo leng Khangnote mailam ah ih ma hong vang semsem ding hi cih thu manpha khangnote hong hawmsawn nuam ing. Lungdam hi.
By- Fr. Joseph Zo Mung
