Catholic Nisim Lungdamna Laisiangtho. Zehtanhun Nipi Kaal (5) Na. 6.4.2025 (Sun)

John 8:1-11 1. Jesu ahih leh Olive Mual tungah a paito hi. 2. Zingsang tungin biakinnpi ah amah a paikik hi. Mi khempeuh ama kiangah hong pai uh a, amah tusukin amaute thu a hilh hi. 3. Lai siangtho siamte le Pharisee-te in numei-pasal mawhna a bawl laitak a mawh numei khat manin hong paipih uh a, mipite’ mai-ah a dingsak uh hi. 4. Amaute in Jesu’ kiangah, “Sia aw, hih numei in numei-pasal mawhna a bawl laitaka a kiman ahi hi. 5. Tu-in thukham sungah Moses in hih bang numei peuhmah, ‘Suang tawh denglum un,’ ci-in hong vaikhak hi. Tu-in nang bang na ci gen ding hiam?” a ci uh hi. 6. Amaute in amah a mawhmat theihna dingun hih bangin a ze-et uh ahi hi. Jesu kunsuk a, a khutme tawh lei ah lai a gelh hi. 7. Amaute in dong teitei uh ahih manin amah dakto-in, “Note’ lakah mawhna a nei lo peuhmah in numei suang tawh deng masa hen,” a ci hi. 8. Tua ciangin amah khatvei kunsuk kikin a khutme tawh lei ah lai a gelh hi. 9. Tua thu amaute in a zak uh ciangin, ulian pen pan khat khit khat paikhia uh ahih manin amau mai-ah Jesu le a ding numei bek a om lai hi. 10. Jesu daktokik a, numei nu’ kiangah, “Numei aw, amaute koi-ah om ahi hiam? Kuamah in nang hong mawksak lo ahi hiam ? ci-in a dong hi. 11. Numei in, “Kuamah in hong mawhsak lo hi, sia aw,” a ci hi. Tua ciangin Jesu in, “Ken zong kong mawhsak kei hi. Pai inla, tu-a kipan mawhna na bawl nawn kei in,” a ci hi.

Hi in Topa’ Lungdamna Laisiangtho ahi hi.