Catholic Nisim Lungdamna Laisiangtho. Zehtanhun Nipi Kaal (5) Na. 10.4.2025 (Thurs)

John 8: 51-59

51. Ken a man takpi kong genin ah, mi khatpeuh in ka thu a kepcing leh, cikmah hunin sihna ciam kha ngei lo ding hi,” a ci hi.
52. Jew mite in Jesu’ kiangah, “Nang, dawivei na hih lam tu-in ka thei ta uh hi. Abraham si khin a, kamsangte zong a si khin uh hi. Ahi zongin nangmah in, ‘Mi khatpeuh in ka thu a kepcing leh, cikmah hunin sihna ciam kha ngei lo ding hi,’ na ci hi.
53. Nangmah in a sisa ka pa uh Abraham sangin lianzaw na hi hiam? Kamsangte zong a si zo uh hi. Nang kua-a kingaihsun na hi hiam?” a ci uh hi.
54. Jesu in, “Kei le kei ka kipahtawi leh ka minthanna a mawkna a suak hi. Ahi zongin ka min a thangsakpa in ka Pa ahi hi. Note in, ‘Amah in kote’ Pasian ahi hi,’ na ci uh hi.
55. Note in amah na thei kei uh hi. Ahi zongin ken ka hih leh, amah ka thei hi. Amah ka thei kei hi, ci-leng note mah bangin zuauphuak ka hi ding hi. Ahi zongin keimah in amah ka thei a, ama thu zong ka kemcing hi.
56. Na pu na pa uh ahi Abraham in kei kong pai ding ni mu nuamin a lungdam hi. Amah in a muh ciangin zong a lungdam hi,” a ci hi.
57. Tua ciangin Jew mite in ama kiangah, “Kum sawmnga zong pha nai lo napi-in Abraham mu khin na hi hiam?” a ci uh hi.
58. Jesu in amaute’ kiangah, “Ken a man takpi kong genin ah, Abraham a om ma-in kei ka om khin zo hi,” a ci hi.
59. Tua ahih manin amaute in amah a denna dingun suang a tawm uh hi. Ahi zongin Jesu amah le amah kiselin kihemkhia-a biakinnpi pan a paikhia hi.

Hi in Topa’ Lungdamna Laisiangtho ahi hi.