Suangpi Parish Khangnote Pasian Thu Sinna Leh Khangno Pawi (2-7.4.2025)

Suangpi Parish acing akem Rev. Fr. Paul Cung Lian Kap vaihawm siamna tawh Siangtho lungtang Parish sung khangnote Pasian thu sinna leh Khangno Pawi pen Suangpi khua ah April 2-7 dong nasia takin ki bawl hi.
Khangnote Pasian thusinna ah 1. Rev. Fr. Damian Zam Sian Dal in (Khasiangtho Nasepna leh Khasiangtho Thupha), 2. Rev. Paul Pau Kim Tuang in (Tonu Maria Belin Thungetna ii Manphatna) 3. Rev. Fr. Paul Cung Lian Kap in (Pawlpi Tangthu) 4. Rev. Joseph Thang Nen Zo Mung in (Redemption & Salvation, Tatkhiatna leh Gupkhiatna Thu) cih bangin hilhcianna nei uh hi.
Tintan sungin Bro. John Zo Zam Mun leh Bro. Joseph Langh Sian Khai te in La hilhna leh Kimawlna tawh kisai kidemna tuamtuam teng makaih uh hi.
Pawipi ni-in Sakollam Parish pan Rev. Fr. Andrew Thang Muan Tuang leh Khangnote zong hong pai-in Parish khat leh khat tha kipiakna nei uh hi.
Tintan hun sung Pasian thu sinna bek tham lo-in Khangnote in Matthew, Mark, Luke leh John cih bangin khen li-in ki khen in nitak sim lenkhopna hun ah kidemna tuam tuam te bawl uh hi.
Tua banah Nipini kikhop khit ciang Sang tualpi ah Khangnote Numei leh Numei, Pasal leh Pasal a pawl pawl in (Fusal) Bawlung kidemna zong nei uh hi.
Hih Pawi Tintan hunsung kidemna tawh kisai zat ding (လက်​ဆောင်) teng pen Rev. Fr. John Hau Hawm Mang (USA), Pa John Kam Khen Hang (Yangon) leh Pa Moses Dong Phut Lal (Kalay) te in pia khia a hih manin Khangnote in tha ngah mahmah uh hi.
Suangpi Parish sungah Suangpi, Dimlo, Phunom leh Tuisau cih bangin khua (4) om in tua sung pan Khangno Pasian thu sin mimal (200) kim pha uh hi.
Gam sung buaina leh hamsatna tuamtuam hang tawh Pawi a ki bawl loh zawh sawt mahmah ahih manin a ki bawl sunsun ciang Khangnote in tha ngah mahmah uh hi.
Mai lam hunte ah zong Khangnote Pasian thu sinna leh Khangno Pawi ih bawl zawh den nang thungetna tawh ma pang khawm ciat ni.