His Holiness Pope Francis & His Excellency Bishop Felix at Vatican (31.3.2014)

Hih man pen Alianbel Siampipa Pope Francis leh Kalay Diocese hongcing hongkem Siampilian Felix Lian Khen Thang te ii Vatican ah a ki muhkhopna man Rev. Fr. Titus Pau in (31.3.2014) kum in Facebook ah a suahsak na pan a kila kik ahi hi.
Hih man te in bang hong phawksak hiam cih leh Topa Jesu in (AD- 33) kumin Pawlpi khat aphuatna leh tua Pawlpi a makaih dingin Peter a teel na thu, tua Pawlpi tungah Vantung thu leh Leitung thu te ah Ukna Aana a piak na thu leh Hell Khua kong khak te in tua Pawlpi a zawh lohna, Vantunggam kong honna tawh tangte zong tua Pawlpi sungah a piak na thu te hong phawk sak pha mahmah hi (Mt 16:18-19).
Tua tung tawnin a theih huai thu pawlkhat a nuai aa bangin kong hawmsawn nuam hi.
Dawi te in Mihingte kihta lo hi ahi zongin Pawlpi kihta hi. Banghang hiam cih leh Topa Jesu in ama phuatsa Pawlpi ompih den in tua Pawlpi a makaih Peter leh a ma zaluah dingte aa ding thu a ngetsak den man ahi hi (Lk 22:32).
Topa Jesu Phuatsa Catholic Pawlpi sungah Pope a sem masa pa pen Peter hi-in tua pan ki pan ama za aluah suksuk Pope te lak pan Pope Francis ciang pen (266) pha ta hi.
AD-33 kum in Topa Jesu phuatsa RCM Pawlpi pen tu-in Zomite sungah kizel bek thamlo in Zomite sung pan Tuucing Siampilian (Bishop) ih neih na pen Topa Jesu in a Pawlpi sungah minam deidan na nei lo-in mi khempeuh hongit hi cih ki lang pha mahmah hi.
Tua ahih manin Pope Francis leh Bishop Felix te kimuhkhopna etteh in ei Zomi te in Pawlpi ih zon ciang ei beh teng bek, ei minam teng bek cih bangin leitung mite phuatsa Pawlpi sungah ih lut sangin Topa Jesu Phuatsa Pawlpi sungah ih lut zawh nang hanciam ni.
RCM Pawlpi pen Khasiangtho in makaih den ahih manin mivom mikang cih ki deidanna om lo-in Leitungbuppi ah makai khat ii khut nuai ah lungnuam takin na sem khawm thei hi cih phawk ciat ni.
Thu man thutak sungah nungta in Khasiangtho makaihna nuai ah a kalsuan khawmte bek Leitungbup ah ki pumkhat zo hi. Lam khat panin gen leng Khasiangtho a nei teng pen ki pumkhat zo hi cih phawk ni.
Pasian deihna pen ki pumkhatna hi cih phawk in ih upna te sangkhai ni. Ih Biak Topa Pasian in ih minam sung leh leitung buppi ah ki lemna leh ki pum khatna hong khangsak semsem ta hen! Amen.

One, Holy, Catholic and Apostolic Church.