Catholic Nisim Lungdamna Laisiangtho. Easter Monday 21.4.2025 (Mon)

Matthew 28:8-15

8. Tua ahih manin numeite lau le nuam mahmah thuahin han panin a nungzuipite’ kiangah tua thu ko dingin manlang takin a tai uh hi. 9. Jesu in amaute thakhatin na dawntuah a, “Note na cidam ta un,” ci-in a hopih hi. Tua ciangin amaute in Jesu’ kiangah hong pai uh a, a khe kawi-in a bia uh hi. 10. Tua khit ciangin Jesu in amaute’ kiangah, “Lau kei un. Pai unla, ka sanggamte Galilee ah a pai dingin va gen un; tua lai-ah kei hong mu ding uh hi,” a ci hi. 11. Tua numeite a pai laitakun han cingte pawlkhat khuapi sungah pai uh a, thu piang khempeuh siampi makaite’ kiangah a ko uh hi. 12. Siampite le upate kikaikhawm uh a, ngaihsutna khat a geel uh hi. Galkapte sum tampi pia uh a, 13. “Zan laitak ka ihmut kalun, ‘A nungzuipite hong pai-in a luang a gusim uh hi,’ ci-in mite’ kiangah va gen un. 14. Hih thu Pilate in a theih leh, note hong mawhsak lohna dingin kote in amah ka na lungkimsak ding uh a, na buai lohna dingun kong hu ding uh hi,” a ci uh hi. 15. Tua ahih manin galkapte in sumte sang uh a, amaute a kithupiak bangbangin a hih uh hi; tua thu Jew mite’ lakah tuni dongin a kizel lai hi. Hi in Topa’ Lungdamna Laisiangtho ahi hi.