“Laudato Si” Kum (10) Cinna Pawi Kibawl (26.5.2025)
Alianbel Siampipa Pope Francis in May 24, 2015 kum in a gelh Encyclical Letter a nihna “Laudato Si” (Care For Our Common Home) Eite ii Innpi ahi Leitang leh a tunga om Nuntakna Nei Khempeuh itna tawh Kemcing Ni cih thulu tawh a gelh zawh kum (10) cinna pawipi pen Yangon Cineplex Kan Thar Yar Center ah KMSS leh CBCM Social Pastoral Coordination Unit te ii makaih na tawh May 26,2025 ni-in nasia takin kibawl hi.
Tua pawi ah CBCM pan Siadaw te, Kawlgambup Christian Kipawlna (MCC) pan makaite, Diocese tuamtuam pan Siampite, CRCM, RVA & OSC, Youth Commission cih bangin CBCM aa om Commission tuamtuam te leh Pawlpi Sung pan Lasak Siam, Kineih Siamna a nei a minthang zawdeuh အနုပညာရှင် အဖွဲ့ te kisam in “Laudato Si” Pasian leh a bawlsa nate itna tawh kepcing ni cih thulu tawh a kizaih Video- ရုပ်ရှင် lahna ki nei hi.
Tua banah “Laudato Si” tawh kisai-in Laphuah siam kidemna leh Lasak Siam kidemna te zong kibawl hi. Tua te sungah ei Kalay Diocese pan Munlai Parish sunga a sem Sia John Vungh Khan Kap in Laphuah Siam Kidemna ah a thumna hongngah ahih manin ih Diocese min tawh ih lungdam mahmah hi.
Hih pawi ah CBCM President Cardinal Charles Bo kihel theilo a hih manin a mah tangin Bishop Noel Saw Naw Aye in Video tawh kisai a thangah dan Comment piakna nei hi.
Tua khitteh Bishop Raymond Wai Lin Htun in Laphuahsiam kidemna ah a khatna pan a thumna ciang a ngahte Pahtawina Laipi piakna nei hi.
Daw Mary Khin (Programme Manager of KMSS) in hih Video bawlna tawh kisai a theih huai thu te a gen khitteh KMSS Myanmar ii nasepna te pen mizawng acimawh mite huhna piakna, Pilna piakna leh tu laitakin Pope Leo XIV ii thu bulphuhpi ahi (Peace, Justice and Truth) kilemna, mikim ki deidanna omlohna leh thuman na cih thulu nam thum bulphuhin nasem ahih na thu zong gen khiatna nei hi.
A tawpna ah Rev. Fr. Dominic Zabinus (Director of KMSS Yangon) in hih pawi a pian theih na dingin a vaihawm teng leh pawi sungah a kihel teng tungah lungdamkohna nei hi.
Tu kum pen hih “Laudato Si” a kibawlzawh kum sawm a cinna a hih manin hih pawi pen leitungbup Diocese tuamtuam ah limtakin a kibawl theih na dingin May kha 24 pan 31 ciang pan “Laudato Si Week” Laudato Si nipi ci-in ki ciamteh hi.
