Misiangtho Julitta le Cyricus Pawini.(June – 16)
Julitta in Asia Minor, Iconium khua pan, Catholic Christian khat hi a, namlian sungpan leh a hau mahmah innkuan beh le phung sungpan apiang khat ahi hi. Amah pen meigong khat hi a, Cyricus cih kum (3) apha tapa khat nei hi. Amau hun lai pen Christian te a bawlsia mahmah Empiror Diocletian hun hi a, amau nuta in sihna pan a suahtak nading un amau om na khua pan Tarsus ah tai uh hi.
Tarsus ah a om uh asawt pian ciangin amau nuta Christian ahih lam mite in hong thei uh ahih manin man uh a, thunei te kiangah puak uh hi. Tua pan Rome ah paipihin thusit uh hi. Tua hun lai-in Julitta thu a sit thuneipa in Alaxandria ahi hi.
Alaxandria in Julitta kiangah milimte na biak leh namawhna pan hong suakta sak ding hing acih hangin Julitta in Pasian man bek ka bia ding hi ci-in gen hi. Tua ciangin Alaxandria aheh suak a, Julitta kiangpan a tapa lakkhiat sakin simmawh bawlsiat kipan hi.
A Nu Julitta in satna bawlsiatna a thuakna amuh ciangin a tapa Cyricus khasia in kap hi. Tua hun laitakin naupangno Cyricus in Alaxandria ii phei tungah om a, Alaxandria in hanciamin akhemkhem hangin naupangno in Alaxandria ii mai a khut cin tawh phuai-in a Nu sam in kap zaw semsem hi. Tua khit ciangin naupangno Cyricus in amah leh amah kei zong Christian khat hi ing ci-in atangko ciangin thuneite in lamdang sa mahmah uh hi. Hi bang naupangno khat in hi thu te thei in kampau tazen hi ci-in amaute in lamdang sa uh hi. Tua ahih manin kum hizah cia tawh kua in pau hong hilh hiam ci-in a sit uh ciangin naupangno in kei, pilna ciimna tawh hong kidimsak a thuman Pasian kiangah dong un ci-in a gen khit ciangin kei zong Christian khat hi ing ci-in gen leuleu hi.
Alaxandria a hehna khangsemsem ahih manin naupangno pen vanlam ah lawnto in thusitna zum kahlei tungpan bungbuletsa in khiasuk hi. Tua hunin Julitta in lungdamna tawh a tapa vantung a tun ma-in Pasian tungah lungdamna ko hi.
Tua zawh ciangin Julitta in, tuisa so mahmah sungah bawlsiatna thuakin anunung ciang a ngawngtanin thahna thuak hi. Tua hun pen AD 304 hun ahi hi. Tua bangin a thah zawh nangawnun thuneite in Julitta te nuta ii luang Catholic thuzuite in a vui ding uh deihlo ahih manun a tumtumin sattanin mun tuamtuam ah a kithehthang nading in thupia uh hi. Ahi zongin a zan ciangin amaute acing akem vantungmite in Julitta te nuta ii a ki tumtan sathemte gawmtuahin vui uh hi.
Asawt lam ciangin piteek khatin aluang kivuina mun hong thei ahih manin Julitta te nuta ii luangte la-in Biakinn huang sungah vuisak hi. Julitta leh Cyricus te nuta in upna hangin thahna athuak galhangte hi uh a, a ettehhuai Misiangtho te ahi uh hi.
Misiangtho Julitta leh Cyricus te aw…kote adingin thu hong ngetsak un.
