Catholic Nisim Lungdamna Laisiangtho.Hun Nautang Nipi Kaal (11) Na.21.6.2025 (Sat)

Matthew 6: 24-34

24. “Kuamah in to nih’ na sem khawm thei lo hi. Khat mudahin khat it dinga, khat beelin khat a simmawh ding hi. Note in Pasian’ na le mammon’(g) na nasem khawm thei kei uh hi.
25. “Tua ahih manin note kong genin ah, bang ne-in bang dawnin, bang silhin nungta ding cih lungkhampih kei un; nuntakna in nek le dawn sangin thupi zaw a, pumpi in silh le ten sangin thupi zaw hilo ahi hiam!
26. Van a leeng vasate en un; tuate in khai tuh loin, zong la lo uh hi, ansal ah zong khol lo napi-in vantunga om na Pa un amaute a vak hi. Note in tua vasate’ sangin manpha zaw pek hilo na hi uh hiam?
27. A lungkham manin a nuntakna tong khat(h) beek a sotto thei note’ lakah kua om na hi uh hiam?
28. Bang hangin na silh na ten ding uh lungkhampih na hi uh hiam? Gamlak unok pakte’ nuntakzia ngaihsun un. Amaute in na sem loin khau zong a kheek kei uh hi;
29. ahi zongin ken kong genin ah, Solomon nangawn a hoih penin a kizep hangin hih unok pakte(i) ban zo nai lo hi.
30. Tua ahih manin upna neu mite aw, tu ni-in hingin zingciangin mei khuk ah a kikhul ding gamlak lopate nangawn Pasian in tua zahin zem ahih leh note silh le ten hong guan zaw tham ding hilo ahi hiam?
31. Tua ahih manin bang ne-in, bang dawn dinga, bang silh ding ka hi hiam?’ ci-in lungkham kei un.
32. Bang hang hiam cih leh gentile mite(j) in a lungkhampih uh hihte mah ahi hi. Hih nate na kisap lam uh vantunga om na Pa un a thei hi.
33. Tua ahih manin Pasian’ gam le ama dikna na zong masa un. Tua hi leh hih na kisapna dangte khempeuh uh zong hong pia thuah lai ding hi.
34. “Tua ahih manin zingciang thu ding lunghimawh kei un, bang hang hiam cih leh zingciang in amah aading a lunghimawh ding hi. Tuni-a gentheihna in tuni aadingin kicing khin hi.

Hi in Topa’ Lungdamna Laisiangtho ahi hi.