Misiangtho Christina Bolsena leh Christina the Astonishing te Pawini.(July – 24)

Misiangtho Christina pen Pasian umlo ahi, a pianna a Pa mahmah in a upna a nusiat dongin nam tuam tuam tawh thah sawmin, simmawhna thuaktaleh, a ma upna leh Pasian a nusiat sangin a pa simmawhna thuak ding a teel zaw Misiangtho hi.
Christina minnei Misiangtho nih om a, tu a ih gen pen Tyre khua pan Christina hi. Christina pen Pasian umlo nu leh pa sung pan Bolsena, Italy ah suak a, a pa pen khua uk hi in a hau mah mah innkuante ahi uh hi. Kum (11) aphak ciangin a mel hoih mah mah Christina pen tangval khempeuh ii deih nungak khat hong suak hi.
Pasian umlo a pa in a tanu pen dawi milim biakna dan in dawi kumpinu suaksak nuam a, tau tungah kham leh ngun te tawh koihin a namtuite tawh biak apna nei hi. Tangval tampi te, Christina tawh a ki ten nop uh hangin a pa in a tanu pen dawi kumpinu suak sak nuam ahih manin khuaimei vak te, a nam tui mei te hal in a kikoih nading thu pia hi.
Tua hun sungin an tangin thu angen den Christina in ama ii thunget den hun te ngaihsun kikin Pasian tung bek ah a lungsim koih hi. Tua khit ciangin ama kimkot ah a kikoih milim te en in “hi te in mihing te bawl hi lel, mihingte khut tawh bawl na te, Pasian lo ngal mihingte in bang mah bawl thei lo” ci-in Pasian tungah a lunglut sem sem ciangin ama lungtang sunga itna meikuangte in zong Pasian phawk semsem hi.
Ni khat ciangin vantungmi te in ama kiangah pai in Christu Topa ii mo nu ci-in sam uh a, lungdamna thu te hilhin Christina in ama upna hangin gentheih haksatnate thuak ding ahihna gen uh hi. Tua khit ciangin Christina ii kimkot a om milim te sukhamin kongkhak neu panin vantungmite in Christina khia suk uh hi.
A pa hong pai-in a tanu a koih na mun a et ciangin milim kitamzante mu a, a nasem te kiangah milim te koi teng tung khin hiam ci’n a dot ciangin a pa in a thu piang thei tel in Christina tungah bawlsiat ki pan hi. Zan ciangin vantungmi te in Christina ii liamma te bawl sakin an leh tui pia uh ahih manin Christina in a cidam mi khat mah bang kik hi.
A pa in a tanu hoih takin a om a muh ciangin a heh suak a, a tanu ii pang beng hi. Ahi zongin Christina in thuak tentanin a pa ii up lohna te nial in milim te kiangah thu ngen kei ning, Pasian man khat bek om hi ci-in a gen ciangin a pa hehna suk sem sem a, a tanu beng gawpin thong sungah khum hi.
Christina a huh a kem sila te khempeuh zong a pa in bawlsia in thah hi. A nu in thong ah pai-in a tanu kiangah Christian upna a nusiat nading a genpih hangin Christina in ahih leh a nuntakna pia zaw ning cih lungsim tawh Pasian tungah a upna kiplet hi. A pa in milim biakna a zuih nading gen leu leu a, ahi zongin Christina in mang tuan lo ahih manin sikkhau te tawh a tanu hencipin meikuang sungah khia hi.
Tua bangin meikuang sungah a khiat hangin Christina in liamma bek ngahin si tuan lo hi. Zan a tun ciangin vantungmi te in Christina ii liamma te bawl sakin a zingsang ciangin dam setsit sa in om hi. Tua bangin bang mah a cih lohna a pa in a muh ciangin suangtum khat a ngawngah ok sakin tui sungah khia leu leu hi.
Tua bangin tui sungah a khiat hangin Christina pen vantungmi te in huh leu leu ahih manin tui tungah a kahtoh kik ciangin bangmah ci lo hi. Tua bangin Christina bangmah a cih tuan loh ciangin a pa in ai siam hi ci-in a tanu ciamteh hi. A ni kik ciangin a pa in Christina thah ding thu pia leu leu hi.
Ahi zongin tua ni zan in a pa si hi. Ahi zongin kamsiatna tawh a pa sih khit ciangin a pa zalaih khua uk pa in zong Christina thah ding hanciam hi. A sa mahmah leh mei kuang tawh a kidim anhuan buk sungah ni (5) sung tawntung Christina khum cip hi. Ahi zongin Christina ii upna hangin tua ni in milim biakna pan mi (300) bangin Pasian um in thu um mi hong suak uh hi. Nam tuam tuam tawh simmawh bawlsia in ni (5) a sawt khit ciangin Christina nungta lai in a om a muh ciangin AD 295 kum ciangin tem tawh dawtin thahna thuak hi.

Misiangtho Christina the Astonishing Pawini.
(July – 24)
Christina in 1150 kumin Belgium gam, Brustem ah suak hi. A nu le pa lokho mi hi-a amah kum 15 a phak hunin a nu le pate in sihsan khin uh hi. Christina kum 20 a phakin nakpi takin a cina-a tua natna tawh si hi. Kivui dingin Missa hun a kibawl laitakin amah thakhat thu-in a tha dimin hong hingkik vat-a, amah a kivuina khua, Sint-Truiden khua mite khempeuh in a mit uh tawh mu-in lamdang sa mahmah uh hi. Amah hong hingkik khit petin hong diangkhia pah-a, inn sung sual tung pan innsun dongah hong leengto hi. Amah in mawhnei mite’ gimnam, namsia sa mahmah-a, thuak zo mahmah ke’ng, ci hi. Mihonpite in Christina’ thugente a zak uh ciangin lamdang a sa semsem uh hi.
Christina in ama sih hun sunga vantung, hell leh meikuangneu sunga a va muh thute genkik hi. “Ka kha in ka pumpi tawh a kikhen phetin vantung mite in hong na dawn uh hi. Amaute’ hong lahna mun ka gal-et leh mial khipkhepin lametna beina, dahna kahna tawh a kidimna ka mu hi. Tua sung khempeuh kha vive tawh kidim hi. Tua kha te in mawhna daan lohna thuak uh-a genzawh lohin nasia takin a thuak uh hi,” a ci hi.
Tua khit ciangin amahin hi bangin a gen zom lai hi. “Tua munah ka meeltheihte tampi na om uh hi. A khasiathuai amau omziate ka muh ciangin ka lungtang hong sukha mahmah hi. Tua ciangin hih mun hell gam ahi hiam, ci-in ka dot leh ‘Meikuangneu ahi hi,’ ci-in vantungmi khat in hong dawng hi. Tua vantungmi in hell gamah zong hong paipih hi. Tua khit ciangin vantung gamah hong paipih-a tua munah nakpitakin nuam-in, lungnopna genzawh lohin ka ngah hi, a ci hi.
Tua munah, “Ka tanu aw, nikhat ni ciangin hih munah kei tawh na hong om taktak ding hi. Tu tadihin ahihleh na deih bang bang ka hong teelsak lai ding hi,” hong ci hi. Tua ahih manin leitung ah Pasian na a sem ding leh meikuangneu sunga khate itna tawh a honkhia dingin a paikik ding na hi hi. Amaute’ thuak tangin leitung ah na thuak ding hi. Nakpi takin leitung ah gimna na va thuak dinga, ahih hangin tua na thuak gimnate’ hangin na si kei ding hi. Nangmah in hotkhiatna na ngah dinga tua bek tham lo-in mawhnei leitung mite nangawn in zong na lahsa mawhna daan lohnate’ hangin a mawhnate uh kikhelin a gitlohnate uh a kisikkik ding uh hi,” a ci hi.
Christina in tua khate’ hamphatna ding thute a zak phetin lunghiangna nei lo-in leitung ah paikik ding a thukim pah hi. Tua hangin sihna pan a hong thokik ka hi hi, ci-in a kim a pam mite kiangah a hong thawhkikna thu a gen hi.
Christina in thakhat thu-in meikuangneu-a khate’ aadingin mawhnadaan lohna a kipan pah hi. Amah leh amah, meiphualpi sungah kikhulin kap kawmin nakpitak gimna a thuak hi. Ahih hangin ama tungah meikangma, liamma cihte a om vet kei hi. Phalbi khuadam hun ciangin zong a vot mahmah tui sungah amah kipap-in thungenin Pasian phat kawmin om hi. Khat veivei ling lakah kikhukin meikuangneu-a khate’ aadingin thu a ngetsak hi. Ahih hangin ama pumpi tungah liama a kipan a pawn nangawn a om kei hi. Christina, kum 74 a phak ciangin teeknatin Saint Catherine – te’ kipawlna Dominican Monastery, Sint-Truiden ah si hi.
Misiangtho Christina aw…kote adingin thu hong ngetsak in.