Catholic Nisim Lungdamna Laisiangtho.Hun Nautang Nipi Kaal (18) Na.7.8.2025 (Thurs)

Matthew 16:13-23

13. Tu-in Caesarea Philippi gam a tun uh ciangin Jesu in a nungzuite’ kiangah, “Mite in Mihing’ Tapa pen kua hi ci uh hiam?” ci-in a dong hi.
14. Amaute in, “Mi pawlkhat in, ‘Tuisawppa John, pawlkhat in Elijah, a dang pawlkhat in Jeremiah ahih kei leh kamsang khat peuhpeuh hi ding hi,’ a ci uh hi,” ci-in a dawng uh hi.
15. Amah in amaute’ kiangah, “Tua ahih leh note in kei, kua hi hong ci na hi uh hiam?” ci-in a dong hi.
16. Simon Peter in, ‘Nangmah in a nungta Pasian’ Tapa, Christu(c) na hi hi,” ci-in a dawng hi.
17. Tua ciangin Jesu in, “Jonah’(d) tapa, Simon aw, nang in thupha a ngah na hi hi! Bang hang hiam cih leh, hih thu si le sa in nang hong theisak hi loin, vantunga om ka Pa in nang hong theisak ahi hi.
18. Tua ahih manin ken kong genin ah: Nang in Petru(e) na hi hi. Hih suangpi tungah ka pawlpi(f) ka lam ding hi. Hell(g) khua’ kongkhakte in tua pawlpi a zo ngei kei ding uh hi.
19. Vantung gam kong honna tawhtangte nang kong pia ding hi. Leitunga na hen khempeuh, vantung ah kihen dinga, leitunga na phel khempeuh, vantung ah zong kiphel ding hi,” a ci hi.
20. Tua ciangin amah Christu ahih lam kuama kiangah a gen lohna dingun a nungzuite khauhtakin thu a pia hi.
21. Jerusalem khuapi ah Jesu pai-in, upate, siampi liante le lai siangtho siamte’ tung panin gimna tampi thuak dinga, kithatin ni thum ni ciangin a thawhkikna ding thute a nungzuite’ kiangah tua hun a kipan teltakin a gen hi.
22. Peter in amah a tuamin paikhiat pih a, “Topa aw, hih bangin na tungah hong pian ding Pasian in phal kei ta hen!” ci-in a taai hi.
23. Ahi zongin Jesu kihei-in Peter’ kiangah, “Satan, ka nungah om in! Kei’ aadingin khaktanna na suak hi. Bang hang hiam cih leh, na ngaihsutnate in Pasian’ ngaihsutna hi lo a, mihingte’ ngaihsutna ahi hi,” a ci hi.

Hi in Topa’ Lungdamna Laisiangtho ahi hi.