Catholic Nisim Lungdamna Laisiangtho.Hun Nautang Nipi Kaal (19) Na.10.8.2025 (Sun)

Luke 13:32-48

32. “Tuuhon tawmnote aw, na lau kei un. Bang hang hiam cih leh, na Pa un note ama gam hong pia nuam hi.
33. Na neihsate uh zuak unla, citpiakna na bawl un. A lui thei lo, sumbawm na bawl un. Gutate in a guk zawh lohna, nget in zong a nek theih lohna, a bei thei lo van kholna vantung ah na khol un.
34. Bang hang hiam cih leh, na neih na lamh na kholna munah na lungsim zong a om ding hi.
35. “Note in na kawng uh gak unla, meivak vaksa-in na om un.
36. Mopawi simna pana hong ciah kik, kong a kiuh phet-a a honpah thei dinga a topa uh a ngakte bangin om un.
37. A topa uh a ciah ciangin tua banga a ngak laitak a tuah nasemte in thupha a ngah ding uh hi. Ken a man takpi kong genin ah, topa in a kawng gakin tua nasemte an ne dingin a tutsak khit ciangin amaute an a vak ding hi.
38. Zankim laitak ahi zongin, khuavak kuan ahi zongin a topa a pai cianga, a topa in kigingsa-a om a tuah nasemte in thupha a ngah ding uh hi.
39. “Ahi zongin gutate hong pai ding hun inn neipa in thei khol leh, ama inn a luhsak lohna dingin pelh loin a pang ding hi, ci-in na thei ta un.
40. Note zong kigingsa-in na om un. Bang hang hiam cih leh, na lamet loh hun laitakun, Mihing’ Tapa hong pai ding hi,” a ci hi.
41. Peter in, “Topa aw, hih thugentehna ko aading bek a hong gen na hi hiam? Ahih kei leh mi khempeuh aadingin a gen na hi hiam? ci-in a dong hi.
42. Tua ciangin Topa in, “A topa in a hun a tun’ ciangin, a innkuanpihte’ annek tuidawn a hawmsak dinga a koih, a citak a pil nasempa kua ahi hiam?
43. A topa hong ciah ciangin, tua banga gamta-a a om a muh nasempa in thupha a ngah ding hi.
44. Ken a man takpi kong genin ah, a topa in a neihsa khempeuh tua nasempa a uksak ding hi.
45. Ahi zongin tua nasempa in, ‘Ka topa sawtveipi hong taam ding hi,’ ci-in nasem-numei le nasem-pasalte satgawpin, an ne tui dawnin, zu kham an khamin om leh;
46. a lamet loh ni le a theih loh kalin a topa hong tung dinga, tua nasempa a topa in dan pia-in a citak lote tawh mun khat ah a koihkhawm ding hi.
47. “A topa’ deihna thei napi-in, a topa’ deihna banga gamta lo a, a kiging khol lo tua nasempa in nakpi-in satna a thuak ding hi.
48. Ahi zongin a topa’ deihna thei lo a, satna dinga kilawm a gamta nasempa in tawmno satna a thuak ding hi. Hehpihna tampi a ngahte in tampi-in a lohkik ding hi. Muanna tak tawh tampi a ki-apte tung panin a tamzaw kingen kik ding hi.

Hi in Topa’ Lungdamna Laisiangtho ahi hi.