Misiangtho Daniel Comboni Pawini.(October

Misiangtho Daniel Comboni in Italy gam, Limone sul Garda ah 1831 kumin suak hi.

Italy gam, Verona a om mizawng naupangte adingin a ki phuan sangah pilna sin in a om khangno khat pen Africa pan khut vanin kisam hi. Tua sang ii director in Africa thu a lunglut mahmah khat hi a, a sangnaupangte kiangah zong gen den hi. Sangnaupangte in amah pen Father Congo ci-in sam uh hi. Tua thu te hangin Daniel Comboni i lungsim sung lawngkha ahih manin Africa ah Pasian thu tangko dingin ama nuntakna piakhia hi. 1849 kumin amah in pau namtuamtuam pilna, za tui lam tawh kisai pilna leh Theology te nasiatak in sin kipan hi.

Siampi Ordination a ngah khit ciangin Daniel in 1857 kumin a dang missionary 5 te tawh Africa gam ah zinkhia uh hi. Tui lam tawh pai uh a, Sudan gam ii khuapi Khartoum ah a tun nading un kha 4 sung sawt hi. Amah in ama nasep vaipuak pen a haksa nasep hi cih tel pah hi. Tua mun aom Africa te in sila zuak nasep asem mihau te hangin Europe mi te um lo uh hi. Tua mun ii khua hun thuakin Pasian na sep ding pen baih lo hi. Amah in a nasepna ah zong tha bei in gimna tawlna thuak zelzel hi.

A naseppih missionary pawl khat te zong si khin uh hi. Amah in a nulepa te a laikhakna ah hi bangin gelh hi. “Ko te khempeuh in na sem ding, khua-ul sisan luangkhia ding leh sihna thuak dingin sapna ka ngah uh hi. Ahi zongin pampaihna athuak Kha te hotkhiat nading leh Topa Jesu it ka hih manun kote in Pasian na sepna leh sihna ka thuak ding uh hi cih kote upna leh sanna in khumin ka puk khak loh nading un kote hong tha khauh sak hi” ci hi.

Kum nih sung Pasianna asep khit ciangin damlohna hang tawh Italy ah ciah kik ding thu hong kulta hi. Khartoum khua ah pai in mission na a sepna uh ah amah leh a lawm nih bek a nungta in om uh hi. Ama mission nasep na gualzo lo hi. Ahi zongin Daniel Comboni in ama tupna khahsuah lo hi. Africa ah mission sep dan a thak khat tawh hih nading in sum zon na khat phuanin Europe gam sungah khualzin khia hi.

Africa pen Africa minamte tawh kikhel sakin upna nei te suaksak nuam hi. Sila zuakna a thuak ding Africa mite hotkhiat nading nasep semin tua bang nasep te a beisiang nading in haksa takin hanciam hi. Africa ah 8 vei bang a zin khiatna hangin Africa mite adingin mission nasep tampi a sem zo dingin vaipuak apna ngah hi. Amahin Nubian Language laibu gelhsak hi. Daniel Comboni, in Khartoum a om amah in it in a nasepna minamte lakah 1881 kumin si hi.

Misiangtho Daniel Comboni aw…Kote adingin thu hong ngetsak tan.