Catholic Nisim Lungdamna Laisiangtho.Hun Nautang Nipi Kaal (31) Na.6.11.2025 (Thurs)

Luke 15:1-10


1. Tu -in siahdongte le mawhneite Jesu’ thu ngai dingin a kiangah hong pai uh hi.


2. Pharisee-te le lai siangtho siamte in, “Hih mipa in mawhneite tawh kikhawlin amaute tawh an a ne khawm hi,” ci-in a ko uh hi.
3. Tua ahih manin Jesu in amaute’ kiangah hih thugentehna a gen hi:
4. “Note’ lakah mi khat in tuu za khat nei-in, tua lakah tuu khat mangsak leh, tuu sawmkua le kua gamlak ah nusia-in a mang tuu khat a muh matengin a zong lo ding kua om na hi uh hiam?
5. A muhkik ciangin lungdamin a liangko tungah pua-in, inn ah a ciah hi.
6. Tua ciangin amah in a lawmte le a vengte sam a, ‘Kei tawh lungdam un; ka tuu mang ka mu zo hi,’ a ci hi.
7. Tua mah bangin ken kong genin ah, kisikkik ding a kisam lo midik sawmkua le kuate’ sangin a mawhna a kisikkik mawhnei mi khat hangin vantung ah lungdamna a lianzaw ding hi.
8. “Thu dang khat ah, numei khat in sumtang sawm nei-in, khat a mansuah leh, meivak vakin a muh matengin a inn phiatin limtakin zong kawikawi lo ding ahi hiam?
9. A muhkik ciangin a lawmte le a inn vengte sam a, ‘Kei tawh lungdam un. Bang hang hiam cih leh, ka mansuahsa sum ka mukik zo hi,’ a ci hi.
10. Tua mah bangin ken kong genin ah, a kisikkik mawhnei mi khat hangin Pasian’ vantung mite a lungdam uh hi,” a ci hi.

Hi in Topa’ Lungdamna Laisiangtho ahi hi.