Catholic Nisim Lungdamna Laisiangtho.Hun Nautang Nipi Kaal (32) Na.13.11.2025 (Thurs)

Luke 17:20-25

20. Khatvei Pharisee-te in Jesu’ kiangah, “Pasian’ gam cik ciangin hong tung ding ahi hiam?” ci-in a dot uh ciangin amah in, “Pasian’ gam mita kimu thei-in hong tung ding hi lo hi.
21. ‘En in, hih lai-ah om hi! Hua lai-ah om hi!’ ci-in kuamah in gen thei lo hi. Bang hang hiam cih leh, Pasian’ gam in note’ sungah a om hi,” ci-in a dawng hi.
22. Tua khit ciangin Jesu in a nungzuite’ kiangah, “Note in Mihing’ Tapa’ nite lakah khat na muh nop hun uh hong tung ding hi. Ahi zongin note in tua ni na mu kei ding uh hi.
23. Mite in, ‘En un, hih lai-ah a om hi! En un, hua lai-ah a om hi!’ ci-in note’ kiangah hong gen ding uh hi. Note na pai kei unla, amau nung na zui kei un.
24. Bang hang hiam cih leh, khuaphialep in van mong khat pan phia a, van mong khat dongin a tanzal mah bangin, Mihing’ Tapa, ama’ ni-a hong pai ciangin tua mah bangin a piang ding hi.
25. Ahi zongin a masa-in amah in gimna tampi thuakin, hih khang mite in a nial ding uh hi.

Hi in Topa’ Lungdamna Laisiangtho ahi hi.