Catholic Nisim Lungdamna Laisiangtho.Hun Nautang Nipi Kaal (33) Na.16.11.2025 (Sun)

Luke 21:5-19

5. Mi pawlkhat in suang meel hoihte le mite’ piakkhiatna tawh biakinnpi hoihtaka a kizepna thu a gen laitakun,
6. Jesu in, “Tua na muh uh nate khempeuh ahih leh, suang khat tungah suang dang khat beek kiciang lo a, a vekpi-in a kicipmang hun hong tung ding hi,” a ci hi.

Limte le Bawlsiatnate
(Mt 24:3-14; Mk 13:3-13)

7. Amaute in Jesu’ kiangah, “Sia aw, hih thute cik cianga hong piang ding ahi hiam? Hih thute hong tun kuan ciangin bang limin hong kithei ding ahi hiam?” ci-in a dong uh hi.
8. Jesu in, “Note kuamah in hong khem zawh lohna dingin na kikem un; bang hang hiam cih leh keima minin mi tampi hong pai ding uh a, keimah in tua pa ka hi hi. A hun hong nai ta hi,’ hong ci ding uh hi. Tua mite’ nung na zui kei un.
9. Gal kidona thu le langpanna ding gamlumna thu na zak uh ciangin na liinglawng kei un; bang hang hiam cih leh tua thute in a piang masa ding mah hi a, ahi zongin, beina hong tung pah nai lo ding hi,” a ci hi.
10. Tua ciangin Jesu in amaute’ kiangah, “Minam khat le minam khat, gam khat le gam khat hong kido ding uh hi.
11. Mun tuamtuam ah zin nakpi-in liing dinga, kialpi le pul hong tung ding hi. Van panin a kihtak-huai nate le lim lianpite hong kilang ding hi.
12. “Ahi zongin hihte khempeuh a pian ma-in, keima min hangin amaute in hong manin hong bawlsia ding uh a, kikhopna inn sung le thong sungah hong khum ding uh hi. Kumpite le mangpite’ mai-ah hong paipih ding uh hi.
13. Hih bangin note in amaute’ tungah teci na panna ding uh hun hoih na ngah ding uh hi.
14. Tua ahih manin note in, ‘Bang ka ci dawnkik ding hiam?’ ci-in na lunghimawh kholh lohna dingun, na lungsim uh khentatsa-in om un.
15. Bang hang hiam cih leh, na galte un note hong nialin hong sel theih lohna dingin kam hatna le pilna note kong pia ding hi.
16. Na nute na pate, na sanggampate, na tanaute le na lawmte nangawn in note hong lehhek ding uh a, note pawlkhat zong hong that ding uh hi.
17. Keima min hangin note in mi khempeuhte’ muhdahna na thuak ding uh hi.
18. Ahi zongin na lutung uh a, na samzang khat nangawn kisia lo ding hi.
19. A tawp dongin lungkiptakin na omna uh tawh note in nuntakna na ngah ding uh hi.

Hi in Topa’ Lungdamna Laisiangtho ahi hi.