Happy (16th) Anniversary Dear Fathers (15.11.2025)

Tuni Siampi Suahzawh kum (16) a cing Siampite lak pan Siampi (7) in Kalay Diocese Centre ah Lungdamkohna Missa Biakpiakna noptakin bawl thei uh hi.
Tua sungah Rev. Fr. Robert Pau Gin Mung in Missa Biakpiakna makaih in Rev. Fr. Cyril Dong Suan Pau in Pasian kammal tawh kha-an vakna nei hi.
Fr. Cyril Paupek in kum (16) sung Pasian piaksa thupha te tungah lungdamkohna a neih khitteh Siampi Sepna ah lungduai ding akisapna thu leh nisimin cihtakna leh hanciamna tawh Pasianna sep ding (Consistency) a kisapna thu te leh Rome Khuapi ah Pasianthu bulphihin khualzin a paina pan a tuah khak thu te gen khia in tha kingah mahmah hi.
Missa man khit ciangin Rev. Fr. Robert Pau Gin Mung in Pasian nasepna ah Nu te ii thu ngetsakna a thupitna thu leh Nute itna ii a manphatna thu ama ii a pianna a Nu tawh a kizopna thu etteh theih dingin hong gen khia in tha kingah mahmah hi.
Missa Biakpiakna sungah Siampite (20) val, Nungak Siangtho te (8) leh Siampi Sinna Sang pan Sangnaupang teng kikhawm uh hi.
Tuni pen Anniversary a bawl Siampi tengin Zing an leh Nitak an vakna neih uh hi.