Misiangtho Bibiana pawini.(December – 2)

Misiangtho Bibiana in 347 kumin Rome ah suak hi. Bibiana ii pa Flavian in Kumpi Julian uk hunin amaitangah sila seal khetna thuakin gampualamah hawlkhiatna thuak a, a sawt lo-in a mai a meima hangin si hi. A pa asih khit kaal nih zawh ciangin a nu Dafrosa in zong ngawngtanin thahna thuak hi.
A tanu nih uh ahi, Bibiana leh Demetria te zong a nulepa asih khit nungah a neih alamh khempeuh uh ki laksakin thong ah khum uh a, an zong ne kha lo uh hi.
Ahi zongin tua lai ah teel theihna khat ngah uh hi. Tua in a upna uh a nusiat uh leh suahtakna ngah dinga, ahi zongin ukpite cih bang a zuih kei uh leh simmawh bawlsiatna thuakin thahna thuak ding cih ahi hi. Ahi zongin Bibiana te unau in leitung neih leh lamh te in amau adingin bangmah lunggulh huai lo ahihna leh sihna leh bawlsiatnate thuak zaw ding hi ung ci-in hangsan takin dawng uh hi.
A sawt lo-in Demetria a tha hong bei-in leitual ah tuksukin si hi. A om lai Bibiana pen ama upna a nusiat theih nang abawlsia dingin Rufina akici numei khat ii khan sungah a ki koih nading thu piakna ngah hi.
Simmawh bawlsiatna athuak hangin Bibiana in thungetna tawh thuak zo hi. Ama thuak zawh na hangin Rufina heh lua ahih manin Bibiana pen khuam tungah henin khau hual tawh a si lo bek zah dongin sat hi. Tua banah suangtawh deng in liamma tampi tawh a sih dong a sat na ding in zong thu ki pia lai hi.
Bibiana in tua simmawh bawlsiatna te nuamna tak tawh thuak in AD 363 kum in, mithat pa khut sungah sihna thuak hi. A sih ciangin a luang pen ui te nek dingin paai uh hi. Ahi zongin Siampi khatin honkhia zo in hoih takin vui hi.
Bibiana te innkuan pen a vekpi un Misiangtho suak uh hi. A Pa St. Flavian pawini pen December – 22 in ki bawl a, a Nu St. Dafrosa ii pawini pen January – 4 ni-in ki bawl hi. A unu St. Demetria ii pawini pen June-21 ni-in ki bawl hi.
Misiangtho Bibiana aw…Kote adingin thu hong ngetsak in.