Misiangtho Anthony Abbot Pawini.(January -17)
Misiangtho Anthony in 251 kumin, Egypt gam ah suak hi. A nu leh pa a sih khit ciangin a nau nu leh inn leh lo te kemin om a, Kum (20) aphak hunin Missa sungah aki sim Laisiangtho ahi, “Na picin nop leh pai-in la, na neihsa khempeuh zuak inla, mizawngte tungah na sumte pia in. Tua hi leh, vantung gamah na manpha na nei ding hi. Tua ciangin hong pai inla ka nung hong zui in,” (Mt 19:21) cih kam mal in alungsim sukha mahmah ahih manin ama ading aki sam mahmah te cih loh, a van neihte zuakin mizawngte piakhia hi.
A sawtlo in bang ne in, “Bang dawn dinga, bang silh ding ka hi hiam? ci-in lungkham kei un” (Mt 6:31) cih Laisiangtho kammal za kik ahih manin a neih lai vante khempeuh mizawngte pia in, anaunu nungak siangtho sangah ap in amah sehnel gamah pai-in zateih suak hi. Anthony pen satan in a tuamtuamin ze-et den hi. Ganhing bangin ahi zongin, numei melhoih mahmah bangin ahi zongin, ama van neihte tawh a kibawl thei hoihna phatna tuamtuam te tawh ahi zongin ze-et den hi.
Ahi zongin Anthony in thungetna leh antannate tawh satan ze-et na te paltan zo hi. Mi tampite in ama kiangah kha lam khantoh nading lampi te dongin amah bel uh hi. Tua ciangin Anthony in amasa pen Christian zateih kipawlna khat phuan khia a, anungzuite kiangah zingsang in tu nitak asi ding mi khat bangin ahi zong in, nitak hunin zingciang zingsang amu kha nawnlo ding mikhat bangin ahi zongin, amau leh amau ki mu in sepna bawlna, gamtatna khempeuhah anunung nuntakna bangin ngaihsunin ahoih pen in semin nuntak nading hilh hi.
337 kumin Rome kumpipa Constantine in Anthony ii thungetna sungah amah leh amah a ki-ap na thu lai tawh at in Anthony kiangah khak hi. 355 kumin, a lawm ahi, St. Athanasius ii thumna hangin Anthony in Alexandria khua ah pai-in Topa Jesu ii Pasian hihna aumlo mite kiangah, Topa Jesu in Pasian hilo in, mihing khat hi lel hi cih thu a man lohna te-ci pangin thu hilh na, na lamdangte bawlna te tawh mite upna khantoh nading hanciam hi. Tua khua kumpipa in amau khua ah sawtpi a om na ding athum ciangin Anthony in ngasa in tui tawh kikhen leh anuntak zawh loh mah bangin zateih in zong amah kia Pasian thu lungngaihna om kei leh kisia thei hi ci-in dawng hi.
356 kum, a sih ding ani bek in a sap hun in Anthony in a nungzui nih sam aa, a sih ciangin mualtung gamdaihna ah a vui nading vaikhak hi. Tua khit ciangin kong it ka ta te aw, kong notset hi. Anthony in no te tawh ki khen ta ding hi. No te tawh om khawm nawnlo ding hi ci-in gen hi. Satan in Anthony a ze-et na dingin a zat ganhingte, hoih takin a zol zawh na pilna hangin Misiangtho Anthony pen lokho mi te leh ganhing te ahuh Misiangtho in ki ciamteh hi.
Misiangtho Anthony awko te adingin thu hong ngetsak tan.
