Catholic Nisim Lungdamna Laisiangtho. Hun Nautang Nipi Kaal (3) Na. 25.1.2026 (Sun)

Matthew 4: 12-23

12. Tu-in Jesu in John’ a kimatna thu a zak ciangin, Galilee gamah a kilehkik hi.
13. Amah in Nazareth(b) nusia-in Zebulun le Naphtali’ gamgi, tuipi gei-a om Capernaum khua ah a teeng hi.
14. Tua bangin a teenna pen kamsangpa Isaiah in:
15. “Zebulun’ leitang! Naphtali’ leitang! Jordan gun galah tuipi lian zuatna lam Gentile mite’omna Galilee gamah,
16. Khuamial sunga teeng mite in khuavak lianpi mu khin uh hi; sihna liim khuamial sunga a teeng mite’ tungah khuavak hong tang khin zo hi,” ci-a a genkholhna a tangtunna ding ahi hi.
17. Tua hun a kipan Jesu in, “Kisikkik un, bang hang hiam cih leh vantung gam hong nai ta hi,”(c) ci-in thutangko a kipan hi.
18. Galilee tuipi gei-ah Jesu a pai laitakin amah in Peter kici Simon le a sanggampa Andrew, unau nihte tuipi sungah ngeen a khuh a mu hi, bang hang hiam cih leh amaute in ngabengte ahi uh hi.
19. Tua ciangin Jesu in amaute’ kiangah, “Ka nung hong zui un; mi a mante kong suaksak ding hi,” a ci hi.
20. Amaute in thakhatin a ngeente uh nusia-in ama nung a zui pah uh hi.
21. Tua panin Jesu a paikhiat laitakin unau dang nih, Zebedee’ tapa, James le a sanggampa John-te in a pa uh Zebedee tawh gunkuang sungah a ngeen uh puaha om a muh ciangin, amah in amaute a sam hi.
22. Amaute in thakhatin a pa uh le a gunkuang uh nusia-in Jesu’ nung a zui uh hi.
23. Galilee gam khempeuh ah Jesu pai kawikawi a, amaute’ kikhopna innte sungah thuhilhin, vantung gam lungdamna thu tangko a, mite’ laka natna khempeuh le cina khempeuh a damsak hi. Hi in Topa’ Lungdamna Laisiangtho ahi hi.