Misiangtho Agatha Pawini.(February – 5)

Misiangtho Agatha in kumzalom 3 hunin Sicily ah suak hi. Aneu tung pankipan Pasian tungah ama nuntakna ap ahih manin amah tawh kiten ding agente khempeuh nial hi. Tua bangin amah atenpih nuam khat in Agatha nial na heh lua ahih manin thu bawl hi.
Decius kumpipa in Christiante abawlsiat hun ahi, 250 kumin numei kizuakte nasepna inn acing pa kiangah Agatha ap hi. Ahi zongin Agatha in Pasian hehpihna tawh kidim in ama lungsim khentatna kip tak in kem cing hi. Kha khat asawt khit ciangin Agatha ii pumpi pen alauhuai set tungah koihin bawlsiatna, sik tawh avunte hawkkhiatna, ciing khau tawh satna cih bangin atuamtuamin bawlsia a, anunungah anawi gawizanin tan sakna cih gentheihna thuak hi.
Ni 4 khit ciangin man(limlang) kitam them te tawh akihel mei am tungah puan silh lo-in koihin bawlsia lai uh hi. Tua bang teng athuak sak khit uh ciangin thongsungah paipih kik uh a, tua laitak in Agatha in “Kei hong bawl ka Pasian aw… nang mahin hih leitung ii itna pan kei nong la a, simmawh bawlsiatna tuamtuamte thuakzawhna thupha nong pia hi. Tu in ka kha hong sangin” ci-in thu ngenin si hi. Misiangtho Agatha pen nurse te ahuh misiangtho in a kiciapteh ban ah zinling na leh nawi tawh kisai (Cancer)natna te ah hong huh Misiangtho in kiciamteh hi.
Misiangtho Agatha aw….ko te adingin thu hong ngetsak tan.