Misiangtho Alexander of Alexandria Pawini. (February – 26)

Langpangna, simmawh bawlsiatna tuam tuam te kawmkal pan, Catholic Pawlpi ii upna le lamlahna, thuman thutak te Pawlpi makai pawlkhatte in a nakep cing manin “Upna kiciamna” cih thungetna ii adeihna hong ki ngahsak hi. Tua bang makaipi te sungpan “Topa Jesu ii Pasian hihna” thu pen upna tawh hong hilhin hong makaih khatin Alexandria khua pan Misiangtho Alexander ahi hi.
Misiangtho Alexander in AD 250 kumin, Egypt gamah suak hi. Amah in Egypt gam, Alexandria khua aom, Pasian thu sinna sang ah vaipuak lian a nei khat ahi hi. Amah Siadaw dingin a kiteel hun in zong amah in Pawlpi upna le lamlahnate hanciam takin hilh sawn, hawmkhia hi. Adiak diakin tua hun lai a Siampi khat ahi, Arius in Topa Jesu in mihing takpi hi a, Pasian taktak hilo hi ci-in amanlo thu tangko aa, ama nungzuite pen Arianism ci-in ki sam hi.
Tua ahih manin Siadaw Alexander hun ciangin adang mipil Siadaw pawlkhat samin Arius pen khial hi cih a ki ciam sak hangin Arius ut lo a, anunung ciangin pawlpi sungpan amah hawlkhia uh hi. A taktak in Emperor Constantine I na mahmah ii thapiakna tawh AD 325 kumin, The Council of Nicaea Siadawpi te thu kikupna bawl uh hi. Tua thu kikupna pan Consubstantial of the same substance cih, “Topa Jesu in Pasian taktak, mihing taktak hi” cih thu kipsakna nei uh hi.
Siadaw Alexander in AD 328 kum, ama kum (78) hunin si hi. Ama zalaih pen Misiangtho Athanasius hi a, Athanasius makaih hun sungin zong amahin Siadawpite ii upna lamlahna bangin Pawlpi makaih hi.
Tuhun Christian eite in zong Pawlpi’ pa te ahi, Siadawpite bangin akip upna, lametna, itnate tawh Pawlpi ii upna lamlahna le thuman thutak, lungdamna thu pen hoihphatak kantelin ih upna bangin anungta, ih gamtat luhekna, ihkampaunate tawh teci apang zo te ih hih zawh nading hanciam ciatni.

Misiangtho Alexander aw…Kote adingin thu hong ngetsak tan.