Misiangtho David Pawini.(March – 1)

Misiangtho David thu akician takin akipulaak loh hangin amah in AD 500 kimin asuak dingin ki ummawh hi. Amah asuah hunin huihpi nasia lua ahih manin suanghawm khat ah suak hi. Tua laitakin vantung pan a nasia mahmah khuaphelep hangin ama suahna mun gei aa suangtumpi phelnih suak hi. Tua suangtumpi gei ah bualtui neu khat om hi. Tua bualtui in mite damsak zo hi kici hi.
David te innkuan in namliante, kumpi namte hi uh a, anung lam ciangin a Nu zong nungak siangtho suak hi. David pen aneu lai in Dewi ci-in min aphuah hi a, Tui sawpna a san ciangin David min la hi. A liat ciangin Siampi sangah pilna sinin zateih Siampi khat suak hi.
David in thu gen siam mahmah zateih Siampi khat ahi hi. Khatvei, mipi mai ah thu a gen laitakin anung lam a om te in amah mu zolo uh ahih manin diang kawmin en uh hi. Tua laitakin Vakhu khat David ii liang tungah hong tuang hi. Tua a lamdang thu mipi in a et laitak mahin Fr. David ii khe nuai leilak pen mual bangin a lianpi hong suakin ama maitang le ama thu gen mipite khempeuhin mu thei in za zo uh hi cih tangthu om hi.
Asawt ciangin amah Siadaw khat suakin Siampi sang (12) lam zo hi. Ama nungzui zateih Siampite in zong amah bangin thungetna ah hanciamin sa nekna, zu dawnna cih te pelhin tui le pongmoh bek ne in om uh hi. A nung lam ciangin Lothangteh bek ne in haksa takin nuntakna ah Pasian thu tawh kalsuan uh hi.
Amaute in Lo khawh nading nangawn Bawng zangh lo-in amau mahmah in amau khut tawh a sep bek mah uh lungkim uh hi. Amah asih ma-in agen aminthang mahmah kammal khatin “Note in kei hong mu in nong za khin uh a, upna ah kipin thu neu no te na sepna uh tawh lungnopna ngah ta un” cih ahi hi. Eite in zong amah ettehin a neu pente sepna tawh ih kha nuntakna thaksuah sak ciatni. Misiangtho David pen Wales gam acing akem Misiangtho hi.
Misiangtho David aw…Kote adingin thu hong ngetsak tan.