Misiangtho Aurea Pawini. (March – 11)

Misiangtho Aurea in 1042 kumin Spain gamah suak a, aneutungpan kipan Misiangthote thu sim denin a etteh den khat ahi hi. Ama deih pen le abelh deuh Misiangtho te in St. Agatha, St. Eulalia le St. Cecilia te ahi uh hi.

Aurea in naupangno khat ahih hangin a innpan paikhia in Nungak Siangtho sangah lut hi. Kum (20) aphak ciangin suanghawm khat sungah Pasian thu lungngai in om a, ama belh deuh le deih deuh Misiangtho thumte tungpan mangmuhna angah khit ciangin amah mahin a teel nuntakzia tawh kalsuan nading tha khauhna ngah mahmah hi.

Aurea tungah Pasian in alamdang na tampi alah khit ciangin ngaihsut hoih ngetna le thu ngetsakna te angen dingin mite ama kiangah pai uh hi.

Aurea in kum tampi nungta lo-in kum tawm khat sungbek nungak siangtho sangah om kha a, nasia takin natna satna a thuak kawmin 1069 kum, ama kum (27) aphak hunin si hi.

Misiangtho Aurea aw….kote adingin thu hong ngetsak tan.