Catholic Nisim Lungdamna Laisiangtho.Vua Hun Nipi Kaal (4) Na.17.3.2026 (Tue)

John 5:1-16 

Tua khit ciangin Jew mite’ pawi ni hong tunga, Jerusalem khua ah Jesu a paito hi.

Tu-in Jerusalem khua-a Tuu Kongpi tawh a kinai-ah, Hebrew kamin Bethzathao kici bual khat a om hi. Tua bual ah talap nga a om hi.
Tuate ah mittawte, khebaite, pumzawte a kipan cina tampite a lum uh hi.
A hun hunin Topa’ vantung mi hong kumsukin tui va lok zelzel hi. Tua tui a tat ciangin a kidiah masa penpen a cinatna peuhpeuh a dam hi.
Kum sawmthum le kum giat sung tawntung a cina mi khat zong tua lai-ah a om hi.
Tua pa lum a om Jesu in a mu hi. Sawtveipi cina a om cih a theih ciangin Jesu in ama kiangah, “Na dam nuam hiam?” ci-in a dong hi.
Cinapa in, “Sia aw, tui a tat ciangin bual sungah hong koih ding mi ka nei kei hi. Keimah ka pai ciangin midang khat na pai khin zel hi,” ci-in a dawng hi.
Jesu in ama kiangah, “ Ding in, na lupna phek la inla pai in,” a ci hi.
Tua pa thakhatin dampah a, a lupna phek la-in lam a pai hi. Tua ni pen Sabbath ni khat ahi hi.
Tua ahih manin Jew mite in damsakna a ngahpa’ kiangah, “Tuni pen Sabbath ni ahi hi; na lupna phek na puak ding thukham tawh kituak lo hi,” ci-in a gen uh hi.
Ahi zong in amah in, “Kei hong damsakpa in, ‘Na lupna phek la inla, lam pai in,’ hong ci hi,” ci-in a dawng hi.
Jew mite in ama kiangah, “Na lupna phek la inla, lam pai in,” hong ci kua ahi hiam? ci-in a dong uh hi.
Ahi zongin cidamna a ngahpa in kua ahi hiam, cih thei lo hi, bang hang hiam cih leh, tua lai-a om mihon tampi lakah Jesu a paikhia hi.
Tua nung ciangin Jesu in biakinnpi’ sungah tua pa mu a, “En in, na damkik khin zo hi. Tua gimna sangin a lianzaw gimna na thuak lohna dingin, mawhna na bawl nawn kei in,” a ci hi.
Tua mipa paikhia a, amah a damsakpa Jesu ahih lam Jew mite’ kiangah a gen hi.
Tua ahih manin Jew mite in Jesu a bawlsiat theihna ding a kipan uh hi, bang hang hiam cih leh amah in hih nate Sabbath ni-in a bawl hi.