Misiangtho Irene Pawini. (April – 3)

Misiangtho Irene in Rome, Italy ah suak hi. Irene i pasal pen St. Castulus hi a, Rome galkap khat ahi hi. Tua hun pen Roma Empire Diocletian in Christian te abawlsiat mahmah hun zong ahi hi. Ahi zongin Irene i pasal Castulus in ahih le Empire Diocletian langpangin Christian suak hi.

Christiante simmawh bawlsiatna thuakin pawlkhat te tai sim uh a, tua a taisim Christian te pen Irene te in amau innah omsak uh hi. Tua lai ah thu umlo mi pawlkhatte zong Christian suakin Tuisawpna sang uh hi. Tua thu pen mikhat in na pholak ahih manin tuisawpna asang mite galkapte man uh hi.

Tua banga akiman mite, thunei te in Christian upna a nusiat uh le nuntakna hong kipia ding hi acih uh hangin amaute in kipaktakin Christian ka hi uh hi na ci uh ahih manin  sih thu khenna thuak uh hi. Tua sungah Irene i pasal in ahingtangpi mahin meihalna thuak a, Irene mahmah in alawmpa luang vui hi.

Irene lawmpa asih zawh asawt loin Sebastian akici mi khat pen ama Christian upna hangin singkung nuaiah khau tawh khihin Thal tawh kap dingin Empire Diocletian in thu pia hi. Thal tawh akap khit uh ciangin mite in amah si ta hi cih upna tawh nusia uh hi. Tua hun laitakin meigong ahi Irene in aluang la in vui ding cih ngimna tawh apai le amah si nailo in anungta lai in ana om na thei ahih manin a inn ah paipihin aliammate bawlsak hi.

Aliammate a dam ciangin Irene in Sebastian a taikhiat nading agen hangin amah tai khia lo a, amah thahna thu apia Empire kiangah pai in thu gen ding khentatin Christian te abawlsiatna a khawl nading a va gen ciangin kumpipa in sih thu khenna pia kik ahih manin amahin tua lai ah thahna thuak hi. Sebastian in zong Rome galkap hihna pan Christian Pawlpi sungah a lut khat ahi hi. Tu ni pawi akibawl Misiangtho Irene pen Thal tawh kapna a thuak Sebastian liammate a bawlsak numei khat in mitam in thei hi. Amah pen AD 288 kumin Rome ah si hi.

Misiangtho Irene aw….kote adingin thu hong ngetsak tan.