Misiangtho John Baptist De La Salle Pawini. (April – 7)
Misiangtho John Baptist De Salle in 1651 kum, April (30) ni-in France gam Rheims khua ah suak hi. Lungsim hoihin Pasian thu a hanciam mahmah a Nu le Pa te in amah Paris khua, Siampi sinna sangah lut sak a, 1678 kumin tua sang mah pan Siampi suak hi. Amah in Siangtho Pumpi Sacramentu zahtak mahmah ahih manin mi tampite in amah itin zahtak uh hi.
Sangsaap kila lo, a khawnkhong-a sang kikahsakna sang nihte in ama kiangah sang siapi a sepsakna dingin huhna a ngen uh hi. Amah in tua huhna a ngetna uh sang pah-a kum li sung tua sangte ah siapi sem hi. Tua khit ciangin John in ama nuntak sung teng khangnote pilna sinsak dingin khentat hi.
A nu le pa te nusiat a luah ding gamh tampite tawh piakkhiatna thupha bawl hi. Amah leh a khangnote in pilna tawh kisai nasepna ah kipumpiakin na a sepna dingun kiciamna bawl uh hi. Tua in De La Salle brother-te’ nasep hong kipatkhiatna ahi hi. John in High School khat leh pasalnote’ aading nuntak kivakna ding tawh kisai siamsinna sang khat hong hi. Tua banah sia sinna sang khat zong hong hi.
John in 1719 kum, April kha ni 7 ni-in si-a, 1900 kumin misiangtho a suahna hi, ci-in kitangko hi. 1950 kum ciangin Pope Pius XII in misiangtho John Baptist De La Salle pen sangsiate a cing a kem misiangtho in tangko hi. Misiangtho John Baptist De Salle pen, ‘Hun thak tawh kizui-a pilpa i pa,’ ci-in zong mi tampi in thei uh hi.
Misiangtho John Baptist De La Salle aw. … Ko te a dingin thu hong ngetsak tan.
