HEHPIH SIAM TOPA JESU PAWI. 12.4.2026 (Sun)
Tuisawpna Sacramentu mah bangin i Kha hong siangtho sakin i mawhnate khempeuh maisakna thupha ngah theih nading ni-in Hehpih Siam Topa Jesu pawini ahi hi.
Hehpihsiam Topa Jesu Nipi ni in ama ii alian mahmah hehpihna pen nidangte tawh kibang lo-in alamdang diakin amah tungah upna tawh angen mite ii mawhna khempeuh maisakna bek thamlo, mawhna dan loh nading khempeuh pan zong maisakna ka pia ding hi ci-in 1930 kumin Hehpihsiam Topa in Misiangtho Faustina kiangah na gen hi. Tua zawh kum (70) asawt khit ciangin hehpihsiam Topa pawini thu pen Topa Jesu mahmah akilahna ahi, Sr. Faustina pen Misiangtho suahna a kitangko kawmin amah mah zong Misiangtho asuak ahi, Pope John Paul II in kum 2000 cin kumin Thawhkik pawi ii anunung ni (8)ni ahi, Nipi ni pen Divine Mercy Sunday ci-in kipsakin tangko khia hi.
Catholic Christiante in angei bangin hile abawlkhak mawhna adingin Siampite kiangah mawhsutin tua khit ciangin Pasian ii mawh maisakna a ngah hangin tua mawhna hangin bawl ding mawhna dan lohna pen ei mahmah in loh kul/sep kul hi. (Gentehna-Sumbuk khat ah ei hangin van khat peuhpeuh akisiat le sumbuk nei pa/nu kiangah i thuum ciangin maisakna i ngah hangin tua akisia van tang ding i loh kul hi. A van manpha le amanphat zui in i lohna zong lian ding hi.) Mihing in mawhna abawl khak sialin mihing’ kha zong sukha hi. Ih bawlkhak mawhna aliat le aliatna tawh kizui in mawhna dan i loh ciangin hi leitung nuntak sung loh zawhna tawh akicin kei le i sih khit ciangin Purgatory, gimnaneu ah ih loh kha lai ding hi. Tua nangawn akisikkik kha te cihna hi. Mawhna lian bawlin kisikkikna nei lo-in a si mite ahih le hell sung a tun ding bek mah omta hi.
Mihing in mawhna a bawlkhak sialin tua mawhna hanga piangding hoihna/siatna cihte ngihsut zawhna, ahoih apha khen tel theihna le aman itna te neih zawhna cih bangin mihing’ kha ii sepzawhna te susia hi. Mihing’ kha zong nin sak hi. A siangtho lo mihing kha in a siangtho mahmah vantung gamah lut suak zawh nading piang thei lo hi. Ahi zongin hehpih siam Topa Jesu ii alamdang hong piak thupha hangin apiang zolo ding thu te hong piang zo hi. Koi ci bang hiam cih leh a zenzen in anuntakna sung tawntungah mawhna lian tawh akidiah mikhatin Divine Mercy Sunday ni in ama mawhnate adingin kisikin mawhsutin, Siangtho Pumpi sangin si zenzen leh amah in Purgatory ah om ding nangawn kisam nawnlo in vantunggam ah lut suak theihna thupha ngah ding hi ci-in Misiangtho Faustina ii diary siksanin Catholic Pawlpi’ (CCC) Pasian thu laigil te online pan a tangko/ahilh zel American Siampi Fr. Ala in a gen ngei khat om hi. Hehpih siam Topa Jesu pawini in alamdang diak a hong piak thupha hangin Hehpih Siam Topa Jesu tungah “Vantungmite le mihingte ii lungsim ngaihsutna tawh a ki ban zolo, lametna om lohnate tungah lametna te hong pia in hehpih siam Topa” ci-in Hehpih Siam Topa Khi ih khin ciangin phatna a ki nei ahi hi.
Mawhnate hangin lungtang sungah sun nisa bangin sa in ih gim ih tawl a, ih lungkiat hun ciangin Hehpih Siam Topa Jesu tungah upna lianpi le kisikna takpi tawh mawhsutin Siangtho Pumpi sang lehang mawhnate khempeuh pan maisakna ngahin tua hun mahin mawhna hangin loh ding mawhna dante khempeuh pan suahtakna ngah ding hi hang.
Hehpih Siam Topa Jesu ii alian mahmah hehpihnate, akisam mimal khat ciat tungah hong tung ta hen.
