Misiangtho Athanasius Pawini. (May – 2)
Catholic upna acing akem ahi, St. Athanasius in AD-293 kumin Egypt gam, Alexandria khua ah suak hi. Pasian thu leh upna thu te a sin khit ciangin Alexandria khua Siadawpa ahuh dingin vaipuak ngaha, AD 328 kum ciangin tua Siadawpa za laih hong suak hi.
A nung lam ciangin upna leh Pasian thu tawh kisai langpangnate amahin hangsan takin hilh kik hi. Tua bangin a langpangte pen adiakdiakin Topa Jesu ii thuthuakna te sang zolo in a nial ahi, Alexandria Siampite leh Arius te ahi uh hi.
AD 325 kum in Nicaea Council ah Pa Pasian leh Tapa Jesu pen a kibang hi ci-in khensatna ki nei himah taleh buaina tuamtuam te veng siang zolo hi. Arian te in kumpi zum ah aana neite ahih uh banah Pawlpi alangpang, upna manlo thute tua munah kizel sak uh hi.
AD 355 kum in tua upna manlo thu mun tuamtuam ah kizel ahih manin St. Jerome in “Leitung pen amau leh amau Ariante kisa in lamdang kisa mahmah hi” ci-in gen hi.
Arian upna anial Siadawte, Pope te pen kumpi langpang in ngaihsun in tuam kep uh hi. Athanasius mahmah in zong kum (17) sungin (5) vei bang gamsung pan hawlkhiatna thuak hi. Thahna thuak ding lau in sehnel gamah a kibu Zateih te kiangah (2) vei bu ngei hi.
AD 363 kumin Athanasius in St. Anthony ii taangthu leh laibu tuamtuam te gelhna tawh a hunte hoih takin beisak hi. AD 373 kumin Athanasius si a, aluang pen Viena ah kipua hi. Ama hanciamna hangin Catholic upna ki honkhia zo ahih manin amah pen Pawlpi acing akem Misiangtho in kiciamteh hi.
Misiangtho Athanasius aw…kote adingin thu hong ngetsak in.
