Catholic Nisim Lungdamna Laisiangtho. Hun Nautang Nipi Kaal (10) Na. A Siangtho pen Christu Si le Sa Pawi. 7.6.2026 (Sun)

John 6:51-58

51. Keimah in vantung pana hong kumsuk a nungta khomun ka hi hi. Hih khomun a ne mi a tawntungin a nungta ding hi. Hih khomun in leitung mite’ nuntakna dinga ka piak ding ka sa ahi hi,” a ci hi.
52. Tua ciangin Jew mite in, “Hih pa in i nek dingin a sa bang hong ci piak theih ding ahi hiam?” ci-in amau sungah khat le khat a kinial uh hi.
53. Tua ahih manin Jesu in amaute’ kiangah, “Ken a man takpi kong genin ah, note in Mihing Tapa’ sa ne loin, a si na dawn kei uh leh, note’ sungah nuntakna om lo hi.
54. Ka sa ne a, ka si a dawn peuhmah in nuntak tawntungna a ngah hi. Ni tawp ni ciangin tua mi ka thokiksak ding hi.
55. Bang hang hiam cih leh, ka sa in an taktak hi a, ka si in dawn ding taktak ahi hi.
56. Ka sa ne a, ka si a dawn peuhmah kei sungah om a, ama sungah kei ka om hi.
57. A nungta Pa in kei hong sawl a, Pa’ hangin ka nuntak mah bangin, kei hong ne peuhmah kei hangin a nungta ding hi.
58. Hih in vantung pana hong kumsuk khomun ahi hi. Na pu na pate un manna ne uh a, a si uh hi; ahi zongin hih khomun a ne peuhmah a nungta tawntung ding hi,” a ci hi.

Hi in Topa’ Lungdamna Laisiangtho ahi hi.