Misiangtho Bernardino Realino Pawini. (July – 2)
Misiangtho Bernardino Realino in 1530 kumin Italy gam, Carpi ah suak hi. Amah in ama ii gualzawhnate nusia in ama nuntakna hun omlai khempeuh Pasian adingin apiakhia khat ahi hi. Hi bangin ei ii gualzawhnate nusia in kipiakkhiat ding cih pen abaih thu hilo hi.
Ahi zongin Bernardino in ahih leh Tonu tungpan mangmuhna angah khit ciangin ama leitung gualzawhnate nusia in Pasian kianglam zuan zo hi. Amah pen mi namlian sung pan asuak khat ahih hangin Pasian thu ahanciam mahmah khat ahi hi. Pilna lam ah zong a siam mahmah lai a zo mahmah khat ahih banah akiniamkhiat mahmah khat zong ahi hi.
Kum (26) aphak hunin sitni khat suak a, mite in amah pen a thuman sitni khat ahihna tawh Missa a kah denna mu uh hi. Kum (32) aphak ciangin a upa kiangah lai khat at in khak hi. Tua laikhak sungah “leitung thu le la te, na te ka deih nawn kei a, Pasian vangliat nading, kha te hotkhiat nading bek ka lunggulh ta hi,” cih ahi hi.
Bernardino in ama nasepna pan angah kha sumte zong mizawng dongtuakte piakhia zel hi. A nasepna ah zong ama siamna hangin zaa khanna angah hangin Tonu kiangpan mangmuhna ngahin Siampi suah ding khentatin kipankhia hi. Siampi a suah khit ciangin khangnote le mizawngte ading in mite in amah apiak uh vaipuak pen ahoih penin semin kipiakhia hi.
Pasian na asepna hun sungin amah in kiniamkhiatna tawh kidim ahih manin mite in anungta Misiangtho cih nangawnin sam uh hi. Kum (30) sung, Italy gam kiim tengah Pasian thu tangko kawikawi in, thu gen asiam mahmah khat zong ahi hi.
Bernardino in ama nuntakna sungah agualzawhna ahi, sitni nasep nusia in kiniamkhiatna tawh zawngkhalna teelin Jesuit Siampi khat in ama nuntak hun om laiteng bei sak hi. 1616 kum, July ni 2 ni, ama kum (86) aphak hun, ama nunung hu abei madeuhin a muk pan daitakin “Ka Topa Jesu le a Siangtho Nu Maria” a cih khit ciangin si hi.
Misiangtho Bernardino Realino aw….kote adingin thu hong ngetsak tan.
