Siampipa in bang hangin Altar nam ahi hiam?
Missa bawl simin Siampipa in Altar anapna ih mu hi. Siampipa in Siangtho Pumpi buk zahtakna pia in khukdin hi. Tua khit ciangin Pasian tau (Altar) lam ah pai hi. Tua zawh ciangin amah in a daih mahmah hangin avanglian mahmah gamtatna khat hih hi. Tua in amah in Pasian/Biakna tau (Altar) nam hi.
Hi bangin Altar napna pen kua mahin tangko ngeilo a, hilhcianna zong om ngeilo hi.
Ahi zongin hih in athuthuk mahmah, kha thu sungah thusim khat nei hi.
Hihin sabuai mawkmawk hilo hi. Pasian tau cihin Topa Jesu mahmah ahi hi.
Pasian tau in a tawntung Siampi, mawhna kihel lo biakapna leh vantung a om Pasian tau ahi, Topa Jesu mahmah ii lim ahi hi. (Heb 13: 10)
Roma biakapna tawh kisai, lamlahna ahi, (GIRM 298) in zong hi bangin kipsak hi. “Singlamteh ii biakapna hong piang sak kik ahi, Pasian tau in Pasian ii nekkhawm pawi zong ahi hi. Tua in lungdam kohna ii bulpi ahi hi.”
Tua ahih manin Siampipa in Pasian tau (Altar) anap ciangin amah in Topa Jesu a nam ahi hi.
Itna, Biakna leh Biakapna ii napna
Hih napna in nidanglai Pawlpi hun pek pankipan in na om khin zo hi. Tua in avanglian deihna nam (3) nei hi. Tua te in-
Itna – Siampipa in Topa Jesu tungah akoih itna leh Topa ii biakapna tungah akoih zahtakna te lim lak hi.
Biakna – Vantung le Leitung kigawmtuah nading hi mun ii siangthona pen amah in a pahtawi na hi.
Biakapna – Hi mun, hi Pasian tau tung mah pan, Topa Jesu in leitung mite a hotkhiat nadingin amah mah biakpiakna, biakapna in kipia ding hi cih thu amah in a kipsakna ahi hi.
Luke 7 sunga numei nu in kisikkikna le itna tawh Topa Jesu ii khe anap mah bangin Siampipa in zong nang adingin amah mah akipiakhia ding tua Topa om na Pasian tau a nam ahi hi.
Pasian tau ah Misiangtho te vante kikem hi.
Catholic Biakinn atam zaw ah Pasian tau khe phungah Tuu no aading in sisan a luangkhia Misiangtho te’ Relics van te ki koih hi. Siampipa in Pasian tau anap ciangin Topa Jesu bek a pahtawi hilo in, Topa sungah a si khin sa, Topa’ biakpiakna tawh a kibangin akipia khia te zong pahtawina apia ahi hi.
Hih in teci tampi (Cloud of witnesses) tawh dai takin kigawmna ahi hi. (Heb 12: 1)
Hihin thupha ngahna pawi khat zong ahi hi. Biakpiakna tau cihin Topa Jesu lim lahna bek thamlo in “Thupha Biakpiakna Tau” zong ahi hi.
Siampipa in Topa’tang (in persona Christi) in mo pa in om a, mo nu ahi, Pawlpi aadingin anuntakna piakkhiat ding kigingsa in om hi. Biakpiakna tau napna in pawipi kipat ma-in kiciamna tawh kibang hi. Tu in amahin Missa biakpiakna ii thuthukna pan Pasian leh Pawlpi kigawmna ah hong makaih ding ahi hi.
Siampipa in Biakpiakna tau a nap ciangin tawmvei sung lunglut takin om in.
Bang teng piang hiam cih ngaihsun kawmin.
Hihin ngeina mawk bek hilo hi. Siampipa in itna tawh Topa Jesu a nohset ahi hi. Vantung le Leitung kigawmtuahna hi. Biak apna, thuthukna leh hotkhiatna te kipatna hi.
Banghang hiam cih leh hi biakna tau pan in singlamteh hong khangkhia kik ding hi. Tuu no in biakna in ap na thuak ding hi. Tua banah hehpihna in leitungah hong luangkhia ta ding hi. Topa’n thupha hong pia ta hen.
