World Day of Prayer for Care of Creation at Sts. Peter & Paul’s Church, Kalaymyo (Sep 6, 2026)
Alianbel Siampipa Pope Leo XIV na lunggulhna leh CBCM pan Siadawpite vaikhakna tawh kizui-in Sts. Peter & Paul Parish priest leh Kalay Diocese Chancellor asem Rev. Fr. Maximian Pau Sian Mung in World Day of Prayer for Care of Creation – Pasian bawlsa mihing ganhing, Singkung lopa nuntakna nei khempeuh limtakin kepcing theihnang Missa Biakpiakna Pawi lianpi khat Sep 6, ni-in Sts. Peter & Paul Biakinn pi ah nasia takin bawl hi.
Tua pawi pen Pope Leo in Vatican ah Sep 1 ni-in nasia takin bawlin Kawlgam aa ding Siadawpite kipawlna CBCM zumpi pan Sep 6 ni-in bawl dingin hong ciapteh sak hi.
Tua tawh kizui-in hih Sts. Peter & Paul Biakinnpi ah a kibawl pawi pi ah Siampi 3, Deacon khat leh thuzuimi 1500 val bang kihel thei hi. Tua pawipi ah RVA Tedim Chin leh Kalay Diocese OSC Director asem Rev. Fr. Joseph Thang Nen Zo Mung in Pope Leo XIV na leh Cardinal Charles Bo ii hawm khiat Document te bulphuhin leitang leh a tunga om Mihing Ganhing, Singkung lopa nuntakna nei khempeuh itna tawh kep cing ding zia limtakin hilhcianna nei hi.
Tua banah khua hun a hoih lohna te zong pen mihing te in singkung lopa te limtakin ih kepcing loh hang ahih na thu leh ih nek ih dawn te khempeuh zong leitang pan a piang a hih manin leitang ahoihna dingin zong kep cing ding a kisapna thu te zong gen hi.
Hih pawi ni bulphuhin mihing te aa ding a kisam Oxygen limtakin ngahzawk nang leh khua huh a hoih tuam nang lunggulhna tawh Rev. Fr. Maximian in Sts. Peter & Paul Biakinn huang sungah singkung (50) bang suansak khin hi. Amah in Biakinn huang sung zong ahoihsak tuam ding leh Khua hun hoihna ding ngimna tawh a kisap lai leh zong suan beh theih dingin gelkholhna a neihna thu te zong hih pawi ni-in pulaak khia hi.
Hih Pawi ih bawlna pen ni khat bek tawh a man hilo in mipi in ih Gam leh ih lei, leitang mahmah itna tawh puah pha leng a tung a a teng mihing gan hing te khempeuh nuntak nuam in nung ta thei ding ih hihna thu phawk in ih Gam ih Lei, Singkung lopa te limtakin ih kep cing zawh nang hanciam ciat ni.
