Misiangtho Francis in 1181 kumin Italy gam, Umbria uk sung, Assisi khua ah suak hi. Sumbawl mihau khat ii tapa ahih mah bangin Francis in sum leh hunte bei in galhang khat bangin om nate leh leitung thu ah nopsakna te tawh aneu hun beisak hi. Khat vei Sakol tung tuangin avak leh lampi ah akihhuai mahmah miphak khat mu hi. Amah Sakol tungpan tuaksuk in tua miphak pa’ liangko tungah ama puantualpi silhsak in tua mipa ii biang napsak hi. Tua pankipan ama ii nuntakna kikhel hong kipan hi. Francis in Kum (25) aphak ciangin St. Damian biakinn lui ah thungen in a om laitak, “Francis, ka biakinn puahpha in” cih ‘aw’ khat a za hi. Amah zong tua azak ‘aw’ ii sawlna bangin biakinn puah ki pan hi.
Biakinn puahphat nading akisam sumte a ngah na dingin Francis in apa’ neihsa ahi puante zuak hi. Tua bangin ahihna te a pa lungkim lo in, amah apiaksa neih leh lamh te ngen kik ahih manin Francis in ama silh laitak a puante suahkhia in “hi puan te in nang ii neihsa te hi, nidang in nang pen leitung pa in Pa ci-in kong sam hi. Tu in ahih leh vantung a om ih Pa bek Pa ci-in ka sam ding hi” ci-in gen hi.
Tua pankipan “Na khempeuh nusia in kanung hong zui in” cih Pasian kammal tawh kituak in anuntak theih na dingin aneihsa nate khempeuh nusia in Pasian adingin kipiakhia in a damlo mite khoi hong kipan hi. Francis in zawngkhal takin, khedap neilo, puansia nipnap tawh thungetna leh mawhna dan lohna te tawh ama nuntakna thak ki pan hi. Tua banga a om na in mi tampite lungsim kaikhawm zo hi.
Amah zawngkhal takin nungta a, lungdamna thu bek tangko hi. Mi tampi takin ama nung zui uha, Lungdamna Laisiangtho tawh kituak thukhun khat suai in tua tawh kituakin nungta in om uh hi. Amaute’ tungpan in Franciscan Order cih hong piangkhia hi. Ama nuntak sung nangawn in leitung mun tuamtuam ah hong ki zel hi. Ahi zongin amah tua makai ahih napan khawl in a dangte amakai sak hi. Ama nuntakna ahi upna, lungnopna, mite’ adingin nasepna, thungetna, Pasian bawlsa nate khempeuhh itna tawh nungta hi.
Francis in Pasian bawlsa nate khempeuh amah tawh unau, sanggam hi ci-in mu a, “Brother Sun and Sister Moon” cih kammal zang hi. Nuntakna nei ganhing, mihingte pan kipan nuntakna neilo suangtum dongin na khempeuh amah tawh lawmta in tua te khempeuh in zong azahtak huai nate ahi uh hi. 1224 kumin Francis amah kia thungenin a om laitak a khe leh a khut te ah singlamteh tungah akikhai Topa Jesu ii liamma te hong om ciangin Topa Jesu tawh ama ii ki pumkhatna in a sangpen dong tung ta hi. Tua bangin liamma angah zawh kum (2) pawl asawt khit, 1226 kumin ama ii a u nu ahi sihna “Sister Death” amuak kawmin si hi.
Misiangtho Francis aw…ko te adingin thu hong ngetsak tan.