Misiangtho Margaret Mary Alacoque Pawini. (October 16)
Misiangtho Margaret Mary in 1647 kum, July kha 22 ni-in France gam ah suak hi. A neu tungin a pa in sihsan a, a Pa sih khit ciangin a nuno simmawhna nasiatak in thuak hi. Tua bang simmawhna te athuak zawh na dingin Margaret Mary in Siangtho Pumpi kiangah tha la den hi. Kum (12) a phak ciangin a inn kuanpihte’ khamna kawmkal pan Visitation nungak siangtho sangah lut hi. Nungak siangtho suah nading asin hunsung in haksatna tampi thuak a, ahi zongin lungduai takin kalsuan zo hi. 1673 kum, December 27 pan kha (18) sung tawntung, Margaret kiangah Topa Jesu Siangtho Lungtang ki langh hi. Topa Jesu in amah samin Siangtho Lungtang itna ii a liatna lak hi. Tua a kilahna ah Topa Jesu in ka lungtang ah mei a kuanna in mihing te ka itna bangzah takin lian hiam cih ka lahna hi-a, amau te in zong kei hong it kik dinguh ka deihna ahi hi, ci-in gen hi. Ka lungtang lingkual tawh kivial a ka lahna pen mihing te in a mawhna uh kisikin mawhna daan lohna abawl ding uh kisam ka sakna hang hi ci hi. Topa Jesu in ka lungtang en in, mihingte bangzahin ka it hiam! ahi zongin amaute in kei a hong it kik kei uh hi. Ka lungtang tungah itna a kineih theih na dingin nang kiangpanin leitung mite’ kiangah a kizelh ding ka deih hi, ci-in gen hi. Tua ban ah Kha kipat ni-nga ni sial in Topa Jesu siangtho lungtang zahtakna leh apna neih den nading, ni-li ni, nitak zankim ma nai (1) hunin zong Siangtho Lungtang apna leh zahtakna bawl nading, Siangtho lungtang pawini bawlna tawh hitaleh apna ding gen hi. Margaret Mary thu gen te a tungsiah te in um lo ahih manin vangliatna khat a lah na dingin ngen uh a, a sawt lo-in Margaret in anasia mahmah natna pan lamdang takin damna ngah kik hi. Tua khit ciangin Margaret Mary in Topa Jesu in ama kiangah agen ahi, dawi ze-et na thuak loh na dingin na tungsiah te thukimpih lo-in bangmah hih kei-in cih thu phawk kik hi. Tua thu mipi te kiangah a ki zelh ciangin pawl khat te in sangzo lo-in, Sr. Mary in an tam anek ding kisam hi ci-in gen uh hi. Fr. Clawd La Colombiere in hih thu tavuan la in Pawlpi u lian te maiah hih vangliatna man hi ci-in thukimpihna thu gen hi. 1687 kumin Topa Jesu siangtho lungtang pahtawina in biak inn khat lam a, tua pan kipan Siangtho lungtang zahtakna pen pawlpi sungah hong ki zel hi. Topa Jesu in Margaret Mary tungah kamciam 12 pia hi. Tua te’ lak pan khat in, ka lungtang bia in a pahtawite anuntak sung bek tham lo-in a sih khit uh ciang nangawnin a kisam thuphate ka pia ding hi, ci-in kamciam na pia hi. 1690 kum, October 17 ni-in Margaret si hi. Misiangtho Margaret Mary aw…ko te adingin thu hong ngetsak in.
