Misiangtho Simon leh Jude te Pawini. (October – 28)
Laisiangtho sungah Simon min pen, Zealot ci-in a kisapna mun khat bek ah om a, tua pen nungzuipi te min aki gelhna ah ki mu thei hi. Luke gelh Lungdamna Laisiangtho sungah Simon pen Zealot (Lk 6 : 15) ci-in agelh hangin Matthew leh Mark lungdamna Laisiangtho te sungah Canan mi ci-in ki gelh hi. Ahi zongin Canan khua pan hong pai pa cihna hi lo-in, “lungsim thalawp mi” cihna ahi hi. Simon cih min nungah Zealot a kibehlam na in Roma te in Palestine gam buluh dingin aki thawi uh ciangin tua gam buluh nuamte a do kipawlna ah Simon zong ki hel ahih man ahi hi. “Zealot” ci-in a kisam mite in minam lungsim anei pha mahmah te hi a, amau gam ah Pasian thu leh, thukham te a thaksuah sak nuam mite ahi uh hi.
Roma minam, kumpi te in tangthu sungah mi namdang Empiror te sangin leitung sawtpi uk zaw uh hi. Roma te uk sungin lampi te hoih takin puahpha in, khantohna tuamtuam te zong sem zo hi. Amaute in kilemna ding thupi sakin kemcing uh hi.
Topa Jesu nuntak sungin zong Roma te nialin leinuai galdona lianpi te zong khat veivei nasia takin om thei hi. Ahi zongin kua in minam lungsim nei hiam cih ki thei lo hi. Topa Jesu in siahdong leh minam lungsim anei pha mahmah mi nih te nungzuipi in a teelna hangin lungdamna thu mun tuamtuam ah ki zel sak zo hi.
Zealot ci-in a kisam, Simon in Kha Siangtho hong kum suk ding lamen in angak nungzuipi te tawh a kibangin (Act 1:13) a om na in ama ii Topa Jesu tungah a thuman na teci lak hi. Roma te tawh a kipawl, siahdong pa Matthew thu tawh kisai in Topa Jesu ii nungzui te in koi ci bangin mu ding uh hiam cih eite in ih mu thei hi. Ahi zongin Topa Jesu tungah amaute’ itna leh upna in amaute lungsim te kaikhawmin ki pumkhat sak hi.
Misiangtho Jude pawini zong tuni ih bawl hi. Matthew leh Mark lungdamna Laisiangtho te sungah Jude pen Lebbeaus (ahih kei leh) Thaddasus ci-in ki gelh hi. Tua kammal te in “a hangsan mi” leh “a thalawp mi” cih khiatna nei hi. Luke gelh Lungdamna Laisiangtho sungah amah pen “James tapa Judah” ci-in sam hi. Lai Siangtho gelh te in amah Judas Iscariot tawh tel takin a kitheih na dingin hanciam ciat uh hi.
Laisiangtho sungah Jude ii gen kammal khat bek ki ciamteh hi. Tua kammal in anunung nitak annek laitakin a gen ahi hi. “A sawt loin leitung in kei hong mu nawn lo ding hi. Ahi zongin note in nong mu ding uh hi. (Jn 14 : 19)” ci-in Topa Jesu in gen hi. Ahi zongin Jude in koi ci bang hong piang ding cih tel lo ahih manin “Topa aw, leitung mite’ tungah kipulaak lopi-in kote’ tungah nang le nang bangci-in hong kipulaak ding na hi hiam (Jn 14 : 22)” ci-in dong kik hi. Topa Jesu in tua thu in Kha thu tawh kisai theih theihna bek tawh aki tuak ding thu ahih na gen hi. Itna anei mi-in muh theihna thupha angah mi hi ding hi.
Misiangtho Simon leh Jude te aw…ko te adingin thu hong ngetsak un.
