Misiangtho Juan Diego Pawini. (December – 9)
Misiangtho Juan Diego in 1474 kumin Mexico khua pan tai 12 a gamlatna, khua neu khat ah suak hi. Juan ii minpi pen Juan Cuauhtlatoatzin hi. Amah in lokho mi khat ahih banah phek phan siam khat zong ahi hi.
1524 kumin Franciscan missionary te Mexico ah a pai uh ciangin Juan te nupa in amaute hoih takin zin do uh a, tua missionary te kiang pan a nupa un tuisawpna sang uh hi. Tua pan Juan te nupa in missionary te tawh a ki nai zawk nading un Tolpetlac a cihna khua ah ki tuah uh hi.
Franciscan missionary te kiangpan in Pasian thu te leh a siangtho nuntak zia te a theih ciangin Juan in siangtho takin nuntak ding khentat hi. Tua ama khentatna hang mahin Tonu kiangpan mangmuhna ngah hi ci-in mite in um uh hi.
Tuisawpna a san zawh 1529 kum ciangin a zi Maria Lucia damlo in hong si hi. Meigong ahi Juan in khua dam mah mah hun te ah zong Biakinn pai in kikhawm den hi.1531 kum, December ni (9) ni zingsang in Biakinn a pai laitak, mualtung pan vasa no te lasakna aw za in tua khit ciangin ama min a kisapna aw za hi. Ama min a kisap a zak ciangin amah zong mualtung ah kahto pahin a et leh kum (14) gual numeino khat mu hi. Tua numeino nu ii kiimkot ah vangtang te zong mu hi.
Tua numeino nu in Juan pen amau pau mah tawh hopih hi. Tua khit ciangin Juan kiangah tua a diinna munah biakinn a lam sak nading, Mexico Siadawpa kiangah a gen sak nadingin thum hi. Tua zawh ciangin tua numeino nu in amah leh amah Pasian Nu ahihna leh Juan leh mikhempeuh te ii Nu a hihna, amah in hehpihna tawh a kidim nu ahihna thu te gen hi.
Tua thu te khempeuh Juan in Tonu vaikhak bangin Siadawpa kiangah gen hi. Ahi zongin Siadawpa in um lo ahih manin a zingciangin Tonu tawh a kimuh kik ciangin Juan in Tonu kiangah gen hi. Tonu in Siadawpa kiangah a gen kik nading Juan thum leuleu hi.
Tua bang teng tawh Juan in Siadawpa kiangah a gen kik ciangin Siadawpa in ka up ding na ut leh na lamdang hong pua in ci-in gen hi. December (12) ni ciangin Juan ii pano in dam lo gim mah mah ahih manin Sathau siangtho a nuhsak ding Siampi samin a pano thupha pia nuam ahih manin tua ni Tonu tawh kimuh loh ding khentat hi.
Ahi zongin Siampi sam dingin Juan a paina lam kalah Tonu hong pai-in na pa no silo ding hi ci-in a gen khit ciangin mualtung ah Juan pai sakin lingpaak lo sak hi. Tua mual tungah tua bang khua dam mah mah hun in paak a om ngei lohna thu Juan in thei hi. Ahi zongin Tonu in sawl ahih manin Juan pai-in mualtung a et leh lingpaak tampi a paak mu hi.
Tua ciangin Juan in lingpaak te lo-in a puan ip sungah guan a, Tonu in tua lingpaak te thupha a piak khit ciangin Siadawpa kiang a tun ciang bekin a puan sunga lingpaak te a hongkhiat nading in Tonu in vaikhak hi. Juan in zong Tonu vaikhak bangin Siadawpa tawh kimuh theih nading ngen in Siadawpa tawh akimuh ciangin a puanlom a hong ciangin vangtang mahmah leh tua vangtang sung pan Tonu lim hong kilah ciangin Siadawpa zong Tonu zahtakna pia in Juan ii genna te um pan hi.
Tua ciangin Siadawpa in Tonu a kilahna munah biakinn khat lamin tua munah a sih dongin zateih semin om suak hi. Juan zong tua mun gei ah buuk khat lamin teng hi. Tonu a kilahna thu akizelh semsem ciangin mi tampi Catholic pawlpi sungah hong lut uh hi. 1548 kum in Juan si a, St. Pope John Paul II in Misiangtho suahna tangko khia hi. Juan kiangah a kilangh Tonu pen Guadalupe Tonu ki ci hi.
Misiangtho Juan Diego aw….Kote adingin thu hong ngetsak in.
