Misiangtho Timothy leh Titus te Pawini. (January- 26)
Misiangtho Paul ii Pasian naseppih khat ahi, “Pasian zahtakna” cih min nei, Timothy in Lycaonia gam, Lycia khua ah Jew minam nu leh pa sungpan suak hi. A khangno hunin Laisiangtho sinin St. Paul tungpan tuisawpna sang hi. Timothy in Nunnemna leh unau bang itna tawh a kidim lai nih zong St.Paul kiangpan ngah hi.
Timothy ii hanciamna in ama cidamna sukha thei ahih manin Misiangtho Paul in tui bek tawh a nungta Timothy kiangah, lengzu zong tawmtawm a dawn zel na dingin vaikhak hi. Timothy in Ephesus khua Siadaw dingin teelna ngahin anuntak sung tawntung tua khua ah om hi. AD 97 kumin milim bia, Pasian thu umlo te in amaute’ biakna a langpan na hangin Timothy pen suang tawh denglum uh hi.
Misiangtho Titus in zong St. Paul ii lawm hoih mahmah khat ahi hi. Titus zong Christian pawlpi sungah Misiangtho Paul mahmah in a kikhel sak pa ahi hi. Misiangtho Paul ii a it pen nungzui khat hi aa, anih un Pasian na tampi sem khawm uh hi. Misiangtho Paul in Crete khua Siadaw dingin Titus teel aa, Siadawte ading thukhun a kigelh lai khat zong pia hi. Titus in tua khua mah ah AD 96 kumin si hi ci-in Pawlpi tangthu sung pan ki thei hi.
Misiangtho Timothy leh Titus te aw…Ko te adingin thu hong ngetsak un.
