Misiangtho Angela Merici Pawini. (January – 27)
Misiangtho Angela Merici in Italy gam ah 1470 kumin Pasian thu a hanciam mahmah innkuan sungpan suak hi. Angela kum (10) a phak hunin a nu leh pa in sihsan ahih manin a neutung pan tagah khat ahi hi. Angela in Giana Maria ki ci u numei khat nei hi. Ahi zongin a nulepa sih zawh a sawt lo-in kum (13) a pha pan a u nu in zong sihsan hi. Tua ahih manin Salo a om a pu kiangah Angela va om hi. Ahi zongin a sawt lo-in a pu in zong sihsan leu leu ahih manin Angela ama khua ah ciah kik in a u nu kha ading thunget sak den hi. A unu in asihin Siangtho Pumpi sang kha nailo ahih manin Angela pen a u nu kha ading lunghimawh mah mah hi.
Nikhat, a u nu tung pan, vantung tawh kisai mangmuhna khat Angela in ngah hi. Tua pan lungdam kohna in amah leh amah Pasian tungah ki-ap in (Third order of St. Franciscan) nungak siangtho sangah lut hi.
Angela kum (32) a phak kumin vantung dong ah kahlei tung-a kigual numeinote leh vantung mite a mu hi. Tua laitak tua numei note’ lakpan khat hong paikhia-in Angela kiangah, “Angela aw, tawntung Pasian in nang hong genin-ah, na sih ma-in Brescia khua ah tu-a na muh numeinote tawh a kibang nungak siangthote kaikhawmin kipawl khopna khat na phuan ding hi. Tua in Pasian’ deihna hi,” ci-in gen hi.
Angela in zong Desenzano del Garda khua ah numeinote pilna sinsak nading sang khat phuan a, anihna sang pen Brescia khua ah phuan hi. Tua khua ah numeinote leh adiakdiak in mizawngte pilna sinsak dingin akipia khia nuam lawm (12) ngah hi.
1530 kum ciangin nungaknote in ama nasep ahi, naupangnote Pasian’ thu sinsakna ah hong huh uh hi. Kum 4 khit ciangin Angela’ nasep a huh numeino 28 hong pha hi. Amau kipawlna min pen St. Ursula phuak uh hi. Tua lai-ah a kipawlte in kiciamna nei tuan loin amau inn tek mah uh ah omin thungetna, Pasian’ thu sinsaknate nei uh hi.
Amau te in sang kah hun leh thunget hun te ah a kikaih khop uh hangin akibang puan silhna leh Religious te bawl kiciamnate nei lo uh hi. 1535 kumin mimal tawmno khat ahi, lawmta te in sanginnte acing akem misiangtho Arsula ii huhna nuaiah aki koih Religious khat in piangkhia hi.
Amau Congregation pen Pawlpi sungah amasa pen pilna sinsak, pilna piakhia kipawlna hong suak hi. Angela Merici in 1540 kumin si hi. Misiangtho Angela Merici pen cina te, khut leh khe kicing lo te leh tagahte ahuh misiangtho in kiciamteh hi.
Misiangtho Angela Merici aw….ko te adingin thu hong ngetsak tan.
