Misiangtho Valentine Pawini.(February – 14)
Misiangtho Valentine in kumzalom (3) hunin Roma Emperor Claudias ukna sungpan Catholic Siampi khat ahi hi. Emperor Claudius in galkap uk lianpi khat deih mahmah ahih manin Emperor sunga om pasalte volunteer dingin a kipiakkhiat nading uh lamen hi. Ahi zongin pasal tampite gal kidona te ah ki hel nuamlo uh hi. Amaute in a zi leh a tate nusia nuamlo uh hi.
Tua bangin ahihna uh in Claudius hehsak mahmah hi. Tua hun lai in Roma Emperor kumpi te in amau ukna sung a zai nading in galkuan ding pasalte in zi a neih loh nading in thu pia hi. Tua thu hangin khangno tampite in khat leh khat a ki-it uh hangin ki teenna Sacramentu ngah theih nading hun hoih ngah lo uh hi.
Tua hun sungin Catholic Siampi ahi, Fr. Valentine in kumpipa thu piakna langpangin ama lunggulh nasep khat ahi, nungak tangval ki ngaite hangsan takin ki teenna Sacramentu pia hi. Tua thu in a lunglut huai mahmah thu ahi hi.
Amaute in galkapte khe ging a ngaih kawmin a gingkhia lo (dai) takin kiteenna sacramentu sang uhhi. Nitak khat ciangin khe ging khat za uh hi. Ahi zongin Pasian thupha tawh tua nitak a kiteeng lawmta te in kiteenna Sacramentu a sankhit lian uh tawh ki tuakin amaute suakta uh hi. Ahi zong in galkapte in Fr. Valentine manin thong sungah khum uh a, sihna daan pia uh hi.
Alamdang thu khatin Fr. Valentine ki khumna thong ah khangno tampitakte hawhin paak leh sum dal te ama kongkhak neu pan khiat uh hi. Tua khangnote sungpan khatin thong cingpa tanu ahi hi. Thong cingpa in a tanu pen thong sungah Fr. Valentine kiangah hawh theihna phelna pia hi.
Tua nungak nu in Fr. Valentine kiangah hawh zelin khat veivei ciang nai tampi sung kiho thei uh hi. Fr. Valentine in amah a kithahma hunin vangliatna khat lakkhia hi. Asterius cih galkap khatin mit mulo tanu khat nei hi. Tua a tanu adingin Fr. Valentine in thu angetsak leh atanu mitin khua hong mu thei kik hi.
Tua Thongcing pa tanu tawh Fr. Valentine te in lawmta khat hong suak uh a, Fr. Valentine a ki that ni-in amaute ii ki lawmtatna leh cihtakna hangin lungdam kohna lai khat, a lawm ading gelh hi. Tua laikhak sungah nang ii Valentine (From your Valentine) ci-in gelh hi. Fr. Valentine in AD 269 kum, February 14 ni-in Rome ah thahna thuak hi.
Tua ahih manin St. Valentine Day in lawm kingaite ading ut bangin omkhopna ni hilo hi.
Hi ni-in khangno tampite in ki teenna Sacramentu a ngah theih nading leh nupa khat nuntakna a lam zawh nading un lawm kingai te ading a nuntakna apia khia Fr. Valentine phawkna ni, Happy St. Valentine Day ahi hi.
Lawm kingai te leh nupate acing akem Misiangtho Valentine aw…Kote adingin thu hong ngetsak in.
