Misiangtho Mary Magdalen Pawini. (July – 22)
Misiangtho Mary Magdalen pen Martha leh Lazarus te samggamnu hi. Dawi gilo sagih lut nu, mawh nei nu ci-in aminthang nu (Lk 8:2) hi. Judah gam, Bethany khua mi ahih hang, Magdala khua ah agamtat ki khel ahih manin Mary Magdalena ci-in ki thei hi.
Topa Jesu in Pharisee ahi Simon inn ah nitak an anek lai in Mary in Topa Jesu khe amit tui tawh silsak in paknam tui nuh sak hi. Tua bang a ahihna amu Simon adingin lamdang mah mah hi. Topa Jesu in “ama mawh na tampi ki maisak ahih manin tampi it hi” ci-in gen hi. Tua pankipan Mary in nungzuipi te kisapnate huhin om hi. Topa Jesu Bethany khua, Lazarus inn ah ahawh ciangin Mary in inn nasep sem lo-in Topa Jesu thugen ngai in aom ciangin Martha in Topa Jesu kiangah ko hi. Ahi zongin Topa Jesu in (Lk 10: 41-42) “Martha Martha aw, nangmah in na tampi tungah lung himawh in na kilung gim sak hi. A ki sam na khat bek a om hi. Mary in tua na hoih zaw teel khin a, ama tungpan kilakhia lo ding hi” ci hi.
Topa Jesu gimthuak ma ni guk aki sap in Lazarus inn ah Topa Jesu hawh kik a, Mary in a khe nard sathau namtui anuhsak ciangin Judas Iscariot in tua sathau namtui zuakin mizawngte pia leh hoih zaw ding hi a cih leh Topa Jesu in “ama deih bangin gamtasak un, ka kivui ni ading amahin hih bangin a bawl theihna dingin a lei ahi hi. Mizawngte in note tawh a omkhawm den uh hi. Kei ka hih leh note tawh a om khawm tawntung ding ka hi kei hi” ci hi.
Nipikal a ni masa pen ni, zing sang tung in Mary leh a dang numei pawl khat in Topa Jesu han ah pai uh a, aluang omlo hankhuk hawm amu uh hi. Tua ciangin vantungmi nih in “mi si luang om na ah bang hangin ahing lai mi zong na hi uh hiam? A mah hih lai ah om nawn lo hi, tho kik zo hi” a ci uh hi.
Tua zawh ciangin Mary, anung lam a ki hei leh anung ah ading Jesu a mu hi. Ahi zongin Jesu ahih lam thei lo hi. Jesu in ama kiangah, “Numei aw, bang hangin kap na hi hiam? Kua zong na hi hiam?” ci-in a dong hi. Mary in amah huan cingpa sa-a, “sia aw, amah na puakkhiat mang ahih leh na koihna kei hong gen in. Kei mah in ka va la ding hi’’ a ci hi. Jesu in “Mary aw”, ci-in sam a, Mary ki hei-in Hebrew kamin, “Rabboni,” ci-in a dawng hi. Jesu in ama kiangah, “hong len kei in. Bang hang hiam cih leh, ka Pa’ kiangah ka kahto nai kei hi. A hi zongin ka sanggamte’ kiangah va pai inla, ka Pa ahi note’ Pa, ka Pasian ahi no te’ Pasian kiangah ka kahtoh ding thu amaute’ kiangah va gen in,” ci-in a sawl hi. (Jn 20:11-18)
Misiangtho Mary Magdalen aw…Ko te adingin thu hong ngetsak tan.
