Catholic Nisim Lungdamna Laisiangtho.Hun Nautang Nipi Kaal (22) Na.1.9.2025 (Mon)

Luke 4: 16-30

16. A khan khiatna khua Nazareth ah amah pai a, ama ngeina bangin Sabbath ni-in kikhopna inn ah lut a, Lai Siangtho sim dingin a ding hi.
17. Kamsangpa Isaiah’ laizial amah kipia hi. Amah in tua laizial zalin:
18. “Topa’ Kha Siangtho in ka tungah a om hi. Bang hang hiam cih leh, mizawngte’ kiangah Lungdamna thu a tangko dingin amah in kei sathau hong nilh zo hi. A kiman a kikhum mite’ kiangah suahtakna a tangko dingin ahi zongin, mittawte in khua a muhkik theihna ding uh ahi zongin, nenniamna a thuak mite khahkhiatna ding ahi zongin,
19. Topa’ hehpihna kum a tangko dingin ahi zongin, kei hong kisawl zo hi,” ci-in a kigelhna mun mu-in a sim hi.
20. A sim khit ciangin laizial zial kik a, kikhopna inn nasempa pia-in a tu hi. Kikhopna inn sunga om mi khempeuh in amah limtakin a en uh hi.
21. Tua ciangin amah in, “Hih na zak uh Lai Siangtho thu tuni-in hong tangtung zo hi,” a ci hi.
22. Mi khempeuh in amah phat uh a, ama kam pan hong pusuak thu manphate lamdang a sa mahmah uh hi. Amaute in, “Hih pa, Joseph’ tapa hilo ahi hiam?” a ci uh hi.
23. Jesu in amaute’ kiangah, “ Note in, ‘Siavuanpa aw, nang le nang kidamsak in!’ cih paunak lunghiang loin kei tungah nong zang ding uh a, tua ciangin note in, ‘Capernaum khua-a na bawl na khempeuh na khankhiatna khua hih lai-ah zong bawl in,’ nong ci ding uh hi,” a ci hi.
24. Tua ciangin Jesu in, “Ken a man takpi kong genin ah, ama khua-a kisang kamsang khat beek om lo hi.
25. Ahi zongin thuman thutak in, Elijah khan’ lai-in kum thum le kha guk tawntung van kikhak a, gam sung khempeuh ah kialpi a tun’ laitakin, Israel gamah meigong tampi a om hi.
26. Ahi zongin Sidon gam Zarephath khua-a meigongnu’ kiang longal adangte’ kiangah Elijah kisawl lo hi.
27. Kamsangpa Elisha hun lai-in zong Israel gamah miphak tampi a om hi. Ahi zongin Syria mi Naaman longal kuamah in damna ngah lo hi,” a ci hi.
28. Kikhopna inn sunga om mi khempeuh in tua thu a zak uh ciangin, a heh mahmah uh hi.
29. Amaute dingkhia-in, Jesu khua nawl ah a hawlkhiat khit uh ciangin, khua omna mual dawn kui pan a sawnkhia dingin a paipih uh hi.
30. Ahi zongin Jesu in mihonpite’ lak nawkin a paikhia hi.

Hi in Topa’ Lungdamna Laisiangtho ahi hi.