Misiangtho Dorothy Pawini. (February – 6)
Misiangtho Dorothy in Kumzalom (4) hunin, Turkey ah suak hi. Dorothy ii Pa pen Roma gam uk te lakah khat hi a, amaute pen neihlelamh kicingin anuamsa innkuan te ahi uh hi.
Tua hun pen Roma ah Emperor Diocletian in Christiante abawlsiat mahmah hun ahi hi. Tua bang hunsungah Dorothy in dawi biakna nialin Christian upna bek mah um ahih manin a nulepa, asanggamte nusia in Cappadocia lamah paikhia a, Caesarea khua a tun ciang Siadaw pa tungpan Tui sawpna Sacramentu sangin Dorothy cih min la hi.
Dorothy cih min ii khiatna pen “Pasian’ letsong” cihna hi a, Dorothy in ama min mah bangin a mel hoih mahmah numeino khat ahi hi. Mel hoih mahmah ahih manin tangval tampite ii pahtak nungakno khat zong ahi hi. Ahi zongin Dorothy in amah le amah Topa Jesu tawh a kiletthatsa bangin kituatin midangte tungah lunglutna neilo hi. Dorothy in paak te a it mahmah khat zong ahi hi.
Topa Jesu ii monu khat bangin ama Christian upna bangin anungta Dorothy pen ama upna le biakna thu, kumpi thuneite in a theih uh ciangin man uh hi. Thuneite in amah, Milimte a biak sak ciangin Dorothy in Topa Jesu bek ka bia ding hi ci-in hangsan takin na dawng hi. Tua ciangin thuneite in ni (9) sung, thong sungah khum uh hi.
Tua khit ciangin simmawh bawlsiatnate nasia takin thuakin bungbuletin koihin sikkhau tawh satna, Ciingkhautawh satna, mei tawh halna cih bangin a si lo bekin bawlsia in thong sungah koih kik zel uh hi. Tua bangin thong sung pan khat vei a sapkhiat kik uh ciangin Dorothy in amau bawlsak lo pi-in a bawlsiatna te uh liamma khat beek omlo in angei bangin a na om na mu uh hi.
Thuneite in a nung lam ciangin Dorothy lungsim a kikhel na dingin a nau numei nihte ama kiangah pai sakin zol sak uh hi. Thong sungah hong pai, Dorothy ii naute in a lungsim a kikhel ding ut in a genpih dingin apai ahihna thu Dorothy in a theih ciangin anaute thu hilh bek thamlo, Christian upna sungah lutsak zo hi.
Ni khat, thukhen mangpa Theophilus in Dorothy zahpih bawl hi. Tua thukhenpa in Dorothy kiangah “Na teenpih, na mopa Topa Jesu in ama huang sunga singgahte kei kiangah hong khak sak khin hi” ci-in gen hi. Dorothy in amah sihna daan akipiakni mahin khukdinin thungen a, tua khit ciangin ngawngtanin thahna thuak hi. Dorothy a sih hunin kum (32) bek pha pan a, AD 311 kum ahi hi. A nau nihte zong Christian upna hangin thahna thuak uh hi.
Dorothy ii thungetna hangin Nikhat, kum (6) apha naupang khat in lawhkhai khat sungah Lingpaak thum le Apple pum 3, thukhen mangpa inn ah a puak ciangin thukhenpa in tua van puaka pai tangvalpa pen vantungmi ahihna thei khia ahih manin a lungsim kikhelin amah zong Christian sungah lut hi. A nung lam ciangin tua thukhen mangpa in zong Christian upna hangin thahna thuak hi. Misiangtho Dorothy pen huancingte ahuh misiangtho in kiciamteh hi.
Misiangtho Dorothy aw….Kote adingin thu hong ngetsak tan.
